Alinment necə hesablanır və hansı güzəştlər var? (Misallarla izah)

Əmək Münasibətləri: A-dan Z-yə kitabından seçmə

Aliment məsələsində bir maraqlı məqam da onun necə hesablanıb ödənilməsilə bağlıdır. Tutaq ki, məhkəmə işçinin aylıq əməkhaqqından 25% aliment tutub ödənilməsi haqda qərar çıxarıb. İşçinin aylıq əməkhaqqı əsas iş yerində 250 manatdır. Burada sual yaranır ki, aliment hansı məbləğdən - 250 manatdan, yoxsa vergilər tutulduqdan sonra qalan məbləğdən hesablanmalıdır? Qaydalara əsasən, aliment vergi tutulduqdan sonra ödənilməlidir. Əvvəlcə 250 manatdan 10,78 manat gəlir vergisi ((250-173)x 14 %) və 7,5 manat sosial ayırma (250 x 3%) və 0,5 faiz icbari sığorta -1,25 manat tutulduqdan sonra yerdə qalan 230,47 manatın (250 -10,78 -7,5-1,25) 25%-i hesablanmalı və alı-nan 57,62 manat (230,47x25%) aliment kimi ödənilməlidir.

Qeyd edək ki, Vergi Məcəlləsinin 102.1.5-ci maddəsinə əsasən Alimentlər də gəlir vergisindən azaddır. Alimenti ödəyən şəxs yox, onu alan şəxs həmin aliment məbləği qədər gəlir vergisindən azaddır. Tutaq ki, işçinin aylıq əməkhaqqı 100 manatdır. İşçi boşandığına görə ayda 40 manat aliment alır. Aliment onun iş yerinə ödənilir. Bu zaman işçinin aylıq gəliri 140 manat olsa da, onun 100 manatı gəlir vergisinə cəlb olunacaq.