Xidmət müqaviləsi ilə işə cəlb olunan vətəndaşa əmək kitabçası açılmalı və dövlət sosial sığorta şəhadətnaməsi alınmalıdır?

“Vergi uçotu: A-dan Z-yə” kitabından seçmə

Vergi ödəyicisi tərəfindən vergi uçotunda olmayan şəxslə müqavilə bağladıqda əmək kitabçası açılması qanunvericiliklə nəzərdə tutulmayıb. Azərbaycan Respublikası Nazirlər Kabinetinin 1996-cı il 26 dekabr tarixli, 186 nömrəli qərarı ilə təsdiq olunan “İşçilərin əmək kitabçasının forması və onun tərtibi” Qaydalarına əsasən, əmək kitabçası işçinin əmək fəaliyyətini və əmək stajını təsdiq edən əsas sənəddir. O səbəbdən xidmət müqaviləsi bağlanılması zamanı əmək kitabçasının tətbiqinə ehtiyac yaranmır. Amma “Dövlət sosial sığorta sistemində fərdi uçot haqqında” qanunun 7.7.3- cü maddəsinə əsasən, dövlət sosial sığorta şəhadətnaməsi olmayan şəxslərlə mülki-hüquqi xarakterli müqavilə bağlandıqda, bir ay müddətində həmin şəxsə sosial sığorta şəhadətnaməsi alınması üçün müraciət olunmalıdır. Bu səbəbdən də, vergi ödəyiciləri VÖEN-i olmayan şəxslərlə xidmət müqaviləsi bağladıqda sosial sığorta şəhadətnaməsi tələb etməlidir, əgər vətəndaş sosial sığorta şəhadətnaməsini heç vaxt əldə etməyibsə, bu zaman kartın alınması üçün müvafiq dövlət sosial müdafiə fonduna müraciət olunmalıdır. Vergi Məcəlləsinin “Ödəmələr haqqında məlumatın verilməsi” adlı 73- cü maddəsinə əsasən, vergi ödəyicisi görülmüş işlərin və ya göstərilmiş xidmətlərin haqqını ödədiyi üçün qanunla müəyyən edilmiş hallarda və qaydada ödənilmiş məbləğlər barədə vergi orqanına məlumat verməlidir. Məlumatın hansı formada verilməsi ilə bağlı hər hansı standart forma (bəyannamə, arayış və s.) olmadığı üçün, vergi ödəyicisi sərbəst formada müraciət edə bilər.