“Gallery” Mağazalar Şəbəkəsi: zirvəyə gedən yol

“GALLERY” MAĞAZALAR ŞƏBƏKƏSİNİN RƏHBƏRİ TƏYYAR AKKUBƏYOV QADINLARA HƏDİYYƏ SEÇMƏK ÜÇÜN "MK" OXUCULARINA TƏKLİFİNİ VERDİ

«Uğurlu biznes nümunəsi» rubrikasının ilk qonağı «Real Holding Trading Co.» şirkətinin baş direktoru, «Gallery» Mağazalar Şəbəkəsinin rəhbəri Təyyar Akkubəyovdur. Seçimimiz təsadüfi deyil. Gənc yaşlarından biznesə başlayan Təyyar bəyin yaxın dostu ilə başladığı gül-çiçək biznesi artıq Bakıda brendə çevrilmiş bir mağaza şəbəkəsidir. «İlin şəbəkə biznesi» laureatı olan «Gallery» mağazalarında təklif olunan gül-çiçək və hədiyyələrin çeşidi, keyfiyyəti, yüksək müştəri məmnuniyyəti yaradan xidmətin səviyyəsi ürək açır. Təyyar bəylə söhbətimizdə onun biznesə necə başlamasından, çətinliklərdən, uğurlardan, işadamına lazım olan keyfiyyətlərdən, işçi seçimindən, rəhbər-işçi münasibətindən, bir sözlə uğurlu biznes adamına lazım olan hər şeydən danışmağa çalışdıq.

«HƏR ŞEYİ SIFIRDAN BAŞLADIQ»

- Biz, Bakı Dövlət Universitetinin Beynəlxalq hüquq və beynəlxalq münasibətlər fakültəsinin 2 məzunu - mən və Namiq Babayev 2000-ci ildə «Gallery» mağazasını yaratmaq fikrinə düşdük. Qərara gəldik ki, hədiyyələrlə gül-çiçəyin satışını bir mağazada həyata keçirək. Biz müştəri rahatlığını düşünərək belə qərar verdik. Bu halda müştəri eyni mağazadan həm gül, həm də hədiyyə almaqla vaxta qənaət edə biləcəkdi. Biz bu ideyanı heç bir xarici ölkənin təcrübəsindən götürməmişdik. Düzdür, xaricdə bu tip mağazalara rast gəlmək mümkündür, amma onların heç biri bütünlüklə «Gallery»ə bənzəmir. Beləliklə, 2000-ci ilin may ayında ilk mağazanı açdıq. Hər şeyi sıfırdan başladıq. O vaxt elə də güclü maliyyəmiz yox idi. Öncə yerli topdansatış şirkətlərilə çalışdıq. O vaxt özümüz mal idxal etmirdik. Sonradan işlərimiz qaydasında düşdükcə sərgilərdə iştirak etdik və idxalla məşğul olmağa başladıq. İşlərimizi düzgün qurmağımızın nəticəsində növbəti il daha bir mağaza açdıq. Hazırda 4 «Gallery» mağazımız var. Vaxt ötdükcə iş prosesində yeni ideyalar yarandı. Məsələn, uşaqlar üçün «Gallery4Kids» mağazasını açdıq, artıq 3 belə mağazamız fəaliyyət göstərir. Sonuncu layihəmiz isə, yeni açılmış «Park Bulvar Mərkəzi»ndə fəaliyyət göstərən «Happyland» uşaq əyləncə mərkəzidir.

«YENİ İŞÇİNİN İŞƏ QƏBULU PROSESİNDƏ ŞƏXSƏN ÖZÜM İŞTİRAK EDİRƏM»

- Biznesə yenicə başlayanlara məsləhət görərdim ki, səbrli, doğru və çalışqan olsunlar. Bundan əlavə, iş görəcəkləri sahəni dərindən öyrənməli, məlumat və təcrübə toplamalıdırlar. Təbii ki, rəqabət şəraitində hər bir biznesin riski var. Əvvəlcədən heç kəs deyə bilməz ki, hansısa biznesdə 100 faiz uğur qazanmaq mümkündür. Ona görə də öncə pul qoyduğun biznes sahəsinin risklərini müəyyənləşdirməlisən. Lazımlı işlərdən biri isə təşkilatın brendini yaratmaqdır.

Bəzi işadamları uğur qazandıqca rahatlaşırlar. Düşünürlər ki, artıq işlər qaydasına düşüb, belə gəliri həmişə əldə edəcəklər. Belələrinə məsləhət görərdim ki, bizneslərində dövri olaraq yeniliklər etsinlər. Biz müştərinin diqqət mərkəzində olmaq üçün ildə 10-a yaxın kampaniya keçiririk. Bundan əlavə, biznes tərəfdaşları ilə münasibətdə düzgün olmalısan ki, gələcəkdə problem yaranmasın. İşçilərlə rəhbərin münasibəti də səmimi, yaxın olmalıdır. İşçi hər zaman təklif və ya problemlər barədə müzakirə aparmaq üçün rəhbərliklə rahat əlaqə yarada bilməlidir. Yeni işçinin işə qəbulu prosesində şəxsən özüm iştirak edirəm.

«MÜŞTƏRİNİN KÖNLÜNÜ ALMAQ ÜÇÜN BƏZƏN ONA PULSUZ «ÜZR BUKETİ» DƏ GÖNDƏRİRİK»

- Mağazalarımızda çalışanlara bir əsas fikri aşılamışıq ki, müştəri mal almasa belə, “Gallery”dən məmnun getməlidir. Yenə deyirəm, işçilərdən birinci tələbimiz budur. Filial müdirlərinə və satıcılara müştəri məmnunluğunun artırılması sahəsində ildə 2 dəfə təlimlər keçirik. Müştəri məmnunluğunun vəziyyətini öyrənmək üçün onlar arasında sorğu keçiririk. Bütün mağazalarımızda kameralar quraşdırmışıq. Tez-tez mağazalara baş çəkirik, bu məsələni maksimum diqqətdə saxlayırıq. Məhz bu cür xidmətin nəticəsində VİP müştərilərimiz yaranıb. Müştərilərimiz içərisində böyük təşkilatlar var ki, müqavilə əsasında mərasimlərdə onlara hədiyyə və güllərin çatdırılmasını həyata keçiririk.  Hədiyyə məsələsində müştərilərlə elə də anlaşılmazlıq olmur. Amma gül-çiçək satışı ilə bağlı bəzən problemimiz yaranır. Bəzən olur ki, müştəri telefonla gül dəstəsi sifariş verir və sonra onu bəyənmir. Bu zaman müştərinin razı qalması üçün ortaq dil tapmağa çalışırıq. Hətta müştərinin könlünü almaq üçün bəzən ona türklər demişkən, pulsuz «üzr buketi» də göndəririk.

«İŞÇİ AY ƏRZİNDƏ QÜSURSUZ ÇALIŞANDA ONU MÜTLƏQ MÜKAFATLANDIRIRIQ»

- Hazırda şirkətimizdə 50-ə yaxın əməkdaş çalışır. İşə qəbul edilən işçini daxili qaydalarımızla tanış edirik və artıq o, bilir ki, qarşıda onu hansı motivasiya tədbirləri gözləyir. Motivasiya tədbirləri dedikdə, karyera yüksəlişini, yaxşı işə görə mükafatları və s. nəzərdə tuturam. İşçi ay ərzində qüsursuz çalışanda, satışında yüksəliş olanda onu mütləq mükafatlandırırıq. Əksər filialarımızın müdirləri təşkilatımızda adi işçi kimi işə başlayanlardır.

«BƏZƏN AVROPADA SATIŞ SƏVİYYƏSİ YÜKSƏK OLAN HƏDİYYƏNİ AZƏRBAYCANDA MÜŞTƏRİ QƏBUL ETMİR»

- Hansı hədiyyələrin Azərbaycanda daha yaxşı satılacağını öncədən proqnozlaşdırmaq çox çətindir.  Hədiyyə geniş anlayışdır. Hədiyyə qızıl da ola bilər, maşın da, hər hansı əşya da. Mağazalarımızdakı əsas hədiyyələrə foto üçün çərçivələri, müxtəlif kiçik heykəlcikləri, tabloları, masaüstü vazaları, dekorativ əşyaları, şamları, şamdanları və s. aid etmək olar. İllər ötdükcə hədiyyələrin tərkibi mütləq dəyişməlidir. Azərbaycan müştərisi adətən, bəzəkli və naxışlı hədiyyələri xoşlayır. Avropalılar isə sadə və açıq rəngli hədiyyələrə üstünlük verirlər. O cür hədiyyələri Azərbaycanda da alırlar, amma onların satışı zəif olur. Çeşid tez-tez dəyişməlidir. Çünki Azərbaycan müştərisi yenilikləri xoşlayır. Tutaq ki, 5-10 il əvvəl satdığımız foto üçün çərçivələr indi satışda yoxdur. Bəzən bizə irad tuturlar ki, axı hədiyyə geyim deyil ki, onu  tez-tez dəyişəsən. Bir fakt deyim. Avropalılar evlərindəki vazaları, foto üçün çərçivələri və digər dekortativ əşyaları il ərzində dəyişirlər. Onlar istəyirlər ki, evə gələnlər əşyaların yeniləndiyini görsünlər. Ölkəmizdə də bu cür düşünənlər çoxdur. Bəzən Avropada satış səviyyəsi yüksək olan hədiyyəni Azərbaycanda müştəri qəbul etmir. Misal üçün, Fransa istehsal olunmuş divardan asılmaq üçün əl işi inci qutu hədiyyələr gətirmişdik. Azərbaycanda heç kəs bu hədiyyəni almadı. Amma Avropada bu mal dəbbədir. Bir misal da deyim. Üzərində xırda daşlar olan, dəmirdən hazırlanmış foto üçün minatür çərçivələr gətirmişdik. O da çox az satıldı. Bəzən əksinə də olur. Misal üçün, xırda qəpiklər yığmaq üçün minatür qablar var idi ki, onu gətirəndə yüksək satış əldə edə biləcəyimizi düşünmürdük. Amma müştərilər bu qablara böyük maraq göstərdilər. Çin təqviminə görə ilin dəyişməsi ilə əlaqədar olan hədiyyələrə çox maraq göstərirlər. Amma 7-8 il əvvəl belə hədiyyələrə heç kəs maraq göstərmirdi. Hazırda dənizlə bağlı hədiyyələr gətirmişik. İnsanların bu tip hədiyyələrə marağını öyrənmək istəyirik.  İstəyirik ki, mağazamıza təkcə hədiyyə almaq üçün yox, həm də şəxsi əşya almaq üçün gəlsinlər. Ona görə də elə mallar gətirməyə çalışırıq ki, müştərilər öz evlərinə də alsınlar. Nə qədər mebel, pərdə olsa da, dekorativ hədiyyəsiz ev boş görsənir.

«HƏDİYYƏNİN QİYMƏTİ İKİNCİ DƏRƏCƏLİ MƏSƏLƏDİR»

- Hədiyyə seçiminə yardım göstərmək məqsədilə mağazalarımıza çox müraciət edirlər. Müştəri gəlir ki, yaxın dostuma, qohumuma hədiyyə almaq istəyirəm, amma qərar verə bilmirəm. Bu mənada satıcıların üzərinə böyük məsuliyyət düşür. Onlar müştəriyə çoxlu sual verir, bəzən də mağazada gəzdirərək çeşidləri göstərirlər. Təbii ki, satıcılara bu məsələdə səbr olmağı tapşırmışıq. Potensial müştərinin hədiyyəyə sərf edəcəyi orta məbləğ 50 -100 manat arasında olur.

Şəxsən məndən məsləhət istəsələr, deyərdim ki, əgər hədiyyəni xanıma verəcəksinizsə, mütləq ona gül alın. Gülü dəsti əvəz olunmaz olaraq qalır. Ona görə kişi oxucularımıza məsləhət görürəm ki, xanımlara hədiyyə ilə birlikdə ölçüsündən asılı olmayaraq gül dəstəsi bağışlasınlar. Məncə, hər üç qadından ikisi gül dəsti sevir. Hədiyyəyə gəlincə, təbii ki, o, orijinal olmaqla yanaşı mövzuya da uyğun gəlməlidir.  Ad günü hədiyyəsinin Sevgililər günü və ya Yeni il hədiyyəsindən fərqi olmalıdır. Bəziləri düşünürlər ki, yalnız geyimlər mövsümə uyğun olmalıdır. Bu, belə deyil. Hədiyyələr də mövsümə uyğun gəlməlidir. Hədiyyə seçəndə hər fəslin rəngləri nəzərə alınmalıdır. Hədiyyənin qiyməti ikinci dərəcəli məsələdir. Əsas odur ki, hədiyyə yaddaqalan, orijinal olsun və ən əsası hədiyyə alınan adamı sevindirsin.