Qarşı tərəfə ƏDV məbləği qaydalara uyğun vaxtda ödənilməzsə, bu zaman ƏDV-nin əvəzləşdirməyə məhdudiyyət qoyulacaq?

Dövlət Vergi Xidməti suala aydınlıq gətirir

Sual: Elektron qaimə əsasında əsas ödəniş məbləğini malsatana 27 sentyabr 2022 tarixində tam şəkildə etmişik. ƏDV ödənişini isə 28 sentyabr 2022 tarixində həyata keçirmişik. Bu halda ödədiyimiz ƏDV-ni əvəzləşdirmək hüququmuz varmı və bizə maliyyə sanksiyası tətbiq oluna bilərmi?

Cavab: Dövlət Vergi Xidmətindən bildirilib ki, Vergi Məcəlləsinin 175.1-ci maddəsinə əsasən, bu maddədə başqa hallar nəzərdə tutulmamışdırsa, ƏDV tutulan əməliyyatlar üçün malların (işlərin, xidmətlərin) alışı zamanı ödənilmiş ƏDV məbləği əməliyyatın dəyəri alıcının bank hesabından həmin malları (işləri, xidmətləri) təqdim edən şəxsin bank hesabına, ƏDV məbləği ƏDV-nin depozit hesabına ödənildikdə əvəzləşdirilir. Buna əsasən, sorğuda qeyd olunan halda müvafiq qaydada ödənilmiş ƏDV məbləğinin əvəzləşdirilməsinə məhdudiyyət nəzərdə tutulmamışdır.

Vergi Məcəlləsinin 58.6-cı maddəsinə əsasən, bu Məcəllənin 175.1.3-cü maddəsinə müvafiq olaraq bu Məcəllənin 175.8-ci maddəsində göstərilən vergi ödəyicisi tərəfindən malların (iş və xidmətlərin) dəyəri ödənilən gündən gec ƏDV məbləğinin ödənilməsinə 1 iş günü müddətində ƏDV məbləğinin ödənilməməsinə görə vergi ödəyicisinə vaxtında ödənilməmiş ƏDV məbləğinin 50 faizi miqdarında maliyyə sanksiyası tətbiq edilir.

Sorğunuzda qeyd olunan halda mallar (iş və xidmətlər) təqdim edildikdən sonra ƏDV məbləğinin həmin malların (iş və xidmətlərin) dəyəri ödənilən gündən 1 iş günü müddətində ödənilməməsinə görə vergi ödəyicisinə Vergi Məcəlləsinin 58.6-cı maddəsinə əsasən vaxtında ödənilməmiş ƏDV məbləğinin 50 faizi miqdarında maliyyə sanksiyası tətbiq edilir.

Əsas: Vergi Məcəlləsinin 58-ci və 175-ci maddələri.