Elektron informasiya sistemi niyə müddətin avtomatik artırılmasını həyata keçirmir?

Satışı davam edən “Əməyin uçotu: A-dan Z-yə” (II nəşr) kitabından seçmə

Əmək Məcəlləsinin 73-cü maddəsinə əsasən, müddətli əmək müqaviləsində göstərilən müddət qurtardıqda əmək münasibətləri davam etdirilərsə və müddət bitdikdən sonrakı bir həftə ərzində tərəflərdən heç biri müqaviləyə xitam verilməsini tələb etmirsə, həmin əmək müqaviləsi əvvəl müəyyən olunmuş müddətə uzadılmış hesab olunur.

Maraqlıdır ki, niyə elektron informasiya sistemində müddətli əmək müqaviləsinin uzadılması avtomatik həyata keçirilmir?

Fikrimizcə, elektron informasiya sistemi işəgötürənin təqdim etdiyi məlumatların uçotunu və reyestrini həyata keçirir. Sistem tərəfindən müddətli əmək müqaviləsinin avtomatk uzadılması işəgötürənin səlahiyyətlərinə müdaxilə anlamına gələ bilər. O səbəbdən də, elektron informasiya sistemində müddətin avtomatik artırılması funksiyası nəzərdə tutulmayıb. Bundan əlavə, mümkündür ki, işəgötürən 1 il müddətinə əmək müqaviləsi imzaladığı şəxslə növbəti müqavilə müddətini 1 il yox, 6 ay uzatsın və rəsmiləşdirmə də həmin müddət üzrə həyata keçirilsin. Elektron informasiya sistemi yalnız işəgötürənin daxil etdiyi məlumatların elektron bazada qeydiyyata alınmasını nəzərdə tutur.