Vergi ödəyicisi riskli vergi ödəyicisi ilə əməliyyat apardıqda o da “qara siyahıya” düşməlidir?

Hal-hazırda satışda olan "Vergi uçotu: A-dan Z-yə" (II nəşr) kitabının "Riskli vergi ödəyicisi" bölməsindən seçmə

Vergi ödəyicilərini maraqlandıran məsələlərdən biri də intizamlı vergi ödəyicisini riskli vergi ödəyicisi hesab olunan şəxslə əməliyyat aparmasının nəticəsidir. Çünki bəzi hallarda qarşı tərəf riskli vergi ödəyicisi olmasına baxmayaraq vergi ödəyicisi, obrazlı desək, əmtəəli əməliyyat apara bilər.

Əgər riskli vergi ödəyicisi ilə əməliyyat aparılması qarşı tərəfin də həmin kateqoriyaya aid olunması deməkdirsə, o zaman mobil operator şirkətlərini (“Azercell”, “Bakcell” və s.) və ya xidmət göstərən dövlət qurumlarını (“Azərışıq”, “Azərqaz” və s.) da riskli vergi ödəyicisi saymaq lazımdır. Çünki bu tip vergi ödəyicilərinin əksər vergi ödəyicilərinə xidmət göstərdiyini nəzərə alsaq, onların siyahısında riskli vergi ödəyicisinin olması ehtimalı daha çoxdur.
Vergi orqanlarının rəsmiləri bildirirlər ki, riskli vergi ödəyiciləri ilə mübarizə məqsədilə vergi orqanları çarpaz elektron təhlillər aparırlar. Vergi ödəyicisinin digər şəxslərlə münasibəti aydınlaşdırılır ki, həmin şəxslərlə aparılan əməliyyatlar əmtəəsiz həyata keçirilib, yoxsa yox.
Fikrimizcə, vergi ödəyicisi riskli vergi ödəyicisi ilə apardığı əməliyyatın tək kağız üzərində yox, həm də faktiki olaraq aparıldığını sübut edərsə, onu həmin kateqoriyaya aid etməyəcəklər və ya siyahıdan çıxardacaqlar.