Əmək haqqı üzrə bəyannamə ilə bağlı CİDDİ DƏYİŞİKLİK

Satışı davam edən "Vergi Qanunvericiliyi və Şərhlər Toplusu 2020" kitabından seçmə

Dəyişikliyin forması: Düzəliş və ləğv

150.3.3-cü maddə üzrə:
150.3.3.2-ci maddədə “ƏDV ödəyiciləri və sadələşdirilmiş vergi ödəyiciləri hesabat ilindən sonrakı ilin yanvar ayının 31-dən gec olmayaraq;” sözləri “vergi ödəyiciləri rüb başa çatdıqdan sonra növbəti ayın 20-dən gec olmayaraq verməyə borcludurlar.” sözləri ilə əvəz edilsin;

150.3.3.3-cü maddə ləğv edilsin;
150.3.3. ödəmə mənbəyində tutulan vergilər barədə müvafiq icra hakimiyyəti orqanının müəyyən etdiyi formada bəyannaməni vergi orqanına:

150.3.3.2. bu Məcəllənin 150.1.1-ci və 150.1.2-ci maddələrinə uyğun olaraq ödəmə mənbəyində vergi tutan ƏDV ödəyiciləri və sadələşdirilmiş vergi ödəyiciləri hesabat ilindən sonrakı ilin yanvar ayının 31-dən gec olmayaraq vergi ödəyiciləri rüb başa çatdıqdan sonra növbəti ayın 20-dən gec olmayaraq verməyə borcludurlar;
150.3.3.3. ƏDV ödəyiciləri və sadələşdirilmiş vergi ödəyiciləri istisna olmaqla, bu Məcəllənin 150.1.1-ci və 150.1.2-ci maddələrinə uyğun olaraq ödəmə mənbəyində vergi tutan digər vergi ödəyiciləri rüb başa çatdıqdan sonra növbəti ayın 20-dən gec olmayaraq verməyə borcludurlar.

Açıqlama: 1 yanvar 2020-ci ilə qədər qüvvədə olan vergi qanunvericiliyinə əsasən, ƏDV və sadələşdirilmiş vergi ödəyiciləri müvafiq rüblük hesabatlarının bir bölməsində sadəcə işçilərin sayı, gəliri və vergisi haqqında ümumi məlumatlar təqdim edirdilər. İl başa çatdıqdan sonra isə, muzdla işləyən fiziki şəxslərə ödəmələr haqqında daha geniş məlumatlar (güzəştlər və s.) təqdim olunurdu. 
Vergi Məcəlləsinin 150.3.3.2-ci maddəsində edilən dəyişikliyə əsasən, əmək haqqı üzrə gəlir vergisi hesablayan, yəni muzdla işləyən fiziki şəxslərə ödəmələr verən BÜTÜN vergi ödəyiciləri rüb başa çatdıqdan sonra növbəti ayın 20-dən gec olmayaraq bəyannamə təqdim etməyə borcludurlar.
Bu səbəbdən də artıq ƏDV və sadələşdirilmiş vergi ödəyiciləri də digər vergi ödəyiciləri kimi hesabat ilindən sonrakı ilin yanvar ayının 31-dən yox, rüb başa çatdıqdan sonra növbəti ayın 20-dən gec olmayaraq bəyannamə verməlidirlər.