Vergi ödəyicisinin elektron qaimə-fakturanı kağız formada təqdim etməsi məcburidir?

"Vergi uçotu: A-dan Z-yə" kitabından seçmə

Praktikada qaimə-fakturanın elektron təqdim olunmasına baxmayaraq, kağız formada çapa verib, rəhbər şəxsə imzalatdırıb, möhürlə təsdiq edəndən qarşı tərəfə göndərən vergi ödəyicilərinə də rast gəlinir. Vergi ödəyicisinin bu cür öhdəliyi varmı?

Nazirlər Kabinetinin “Elektron qaiməfakturanın formasının tətbiqi, uçotu və istifadəsi Qaydaları”nda yalnız bir halda elektron qaimə-fakturanın kağız formada çap edilərək təqdim olunması nəzərdə tutulub. Qaydaların 3.4-cü bəndində qeyd edilir ki, vergi ödəyicisi kimi qeydiyyatda olan, lakin elektron qutusu olmayan alıcıya elektron qaimə-faktura ştrix-kod əks olunmaqla çap edilir və mal (iş, xidmət) hüquqi şəxs olan vergi ödəyicisinin imza və möhürü ilə, fiziki şəxs olan vergi ödəyicisinin isə imzası ilə (möhür olduqda möhürlə) təsdiqlənməklə təqdim edilir. Qaydalardan göründüyü kimi, vergi ödəyicisi yalnız elektron qutusu olmayan alıcıya (belə vergi ödəyicilərinə çox az rast gəlinir) elektron qaimə-fakturanın çap şəklində kağız formada təqdim etməlidir. Digər hallarda belə tələb nəzərdə tutulmur.