Mehdi Babayev: “Hələ bilmirik ki, ilin sonunda mikro olacaqsız, yoxsa olmayacaqsız...”

Bakı Hesabat Mərkəzinin direktoru, Milli Mühasiblər Forumunun Təşkilat Komitəsinin sədr müavini, tanınmış ekspert Mehdi Babayev son günlərin aktual mövzusu ilə bağlı mövqeyini açıqlayıb. Mehdi Babayev vergi məsələləri üzrə ekspert Emin Səttarovun məsələ ilə bağlı mövqeyinə hörmətlə yanaşdığını bildirsə də, fərqli mövqe nümayiş etdirib: “Sizin qeyd etdiyiniz kimi, 75 faiz güzəşti nəzərə almaqla, cari vergi ödəməsi hesablanacaqsa, bu hesablamaya vergi orqanı tərəfindən uyğunsuzluğun gəlməsi ehtimalı çoxdur. Vergi orqanı deyə bilər ki, "gəlir vergisi" və ya "mənfəət vergisi" "cari vergi ödəməsi" anlayışı ilə bir kökə bağlı olsa belə, eyni deyil, yaxud da biz hələ bilmirik ki, siz ilin sonunda mikro olacaqsız, yoxsa olmayacaqsız və sair və ilaxır. Və çoxlu əsaslı və ya yarıməsaslı yanaşmalar etməklə vergi orqanının haqlı çıxma ehtimalı çoxdur. Lakin mən yenə də sizin fikrinizi qəbul edirəm və başqalarından da əsaslandırılmış münasibət bildirmələrini gözləyirəm. Çünki, ehtiyat etmək və hazır olmaq lazımdır ki, (məsələsi bizdən iraq) qeyri-dəqiq şərhlər sonda təsərrüfat subyektlərinə problem yaratmasın”.
Mehdi müəllim öz mövqeyini misal üzərində əsaslandırıb: “Məsələn, 2019-cu ilin yanvar ayında fiziki şəxs yeni VÖEN aldı və xidmət göstərilməsi fəaliyyətinə başladı. Belə sahibkar üçün MİKRO anlayışı ilin sonu tamam olmayana qədər müəyyənləşdirilə bilməz və ilin sonuna qədər bu anlayışın təsdiqi üçün həmin sahibkar gözləməlidir. Mikro, kiçik, orta və iri sahibkar meyarlarında (hələlik layihədə) mikronun "İLLİK GƏLİRİ" 200 000 manatadək göstərilib. İLLİK dedikdə təqvim ili, yəni 31 dekabr tarixinə tamamlanan dövr başa düşülür. "Dövriyyəsi artan yekunla 200 000.00 manatı keçmirsə, həmin şəxslərə mikro sahibkarlıq subyekti" fikri "illik gəliri 200 000" ifadəsinə uyğun hesab etmək olarmı? Bu məsələdə ehtiyatlı olmaq lazımdır, deyə düşünürəm.”

Emin Səttarovun mövqeyi ilə taniş olmaq üçün link