Vergi ödəyicinin ən çox şikayət etdiyi problem Vergi Məcəlləsinə edilən dəyişikliklərdə aradan qaldırıldı

Xəbər verdiyimiz kimi, Prezident İlham Əliyev Vergi Məcəlləsinə olan dəyişiklikləri təsdiq edib. Dəyişikliklər zamanı vergi ödəyicilərin şikayət etdiyi bəzi məsələlər də öz həllini tapıb. Mks.az saytının ekspertləri həmin məsələlər haqqında araşdırma aparıb. 

Vergi ödəyiciləri şikayət edirdilər ki,vergi orqanları vergi borcunun yaranması zamanı bank hesabındakı vəsaiti 105 faizi həcmində dondururdusa, bəs niyə ƏDV üzrə borc yarandıqda ƏDV depozit hesabında qalan vəsaiti birbaşa büdcə hesabına köcürür. 01 yanvar 2019-cu il tarixdən etibarən, artıq vergi orqanları vergi ödəyicinin ƏDV Depozit hesabından vəsaiti birbaşa büdcə hesabına ödəyə bilməyəcək. Əgər vergi ödəyici bildirişin alındığı tarixdən 30 təqvim günü müddətində məhkəməyə və ya Vergilər Naziriliyinin müəyyən etdiyi orqana (quruma) şikayət VERMƏDİKDƏ vəsait silinəcək. Vergi ödəyicisi 30 gün ərzində şikayət etdiyi halda bu zaman bildirişdə göstərilən məbləğin 105 faiz həcmində dondurulma olacaq. Vergi ödəyici düzgün olduğunu sübut etdiyi halda, həmin qərar ləğv ediləcək. Bundan əlavə. vergi ödəyicisi ƏDV depozit hesabındakı dondurulmuş vəsaitdən qalan məbləğlər üzrə əməliyyat apara biləcək.

Bu məsələ ilə bağlı Vergi Məcəlləsinə əlavə edilən maddələr aşağıdakılardır:

65.2.3-1. Bu Məcəllənin 65.2.1.1-ci və 65.2.1.4-cü maddələrində nəzərdə tutulan hallar istisna olmaqla digər hallarda vergi orqanının hesabladığı və ya yenidən hesabladığı ƏDV üzrə vergi, faiz və ya tətbiq etdiyi maliyyə sanksiyası üzrə borc məbləğinin 105 faizi həcmində pul vəsaitinin vergi ödəyicisinin ƏDV depozit hesabında dondurulması barədə vergi orqanı tərəfindən qərar qəbul edilir.

65.2.3-2. Vergi orqanının hesablamaları üzrə vergi ödəyicisi tərəfindən bu Məcəllənin 65.1-ci maddəsində göstərilən bildirişin alındığı tarixdən 30 təqvim günü müddətində məhkəməyə və ya müvafiq icra hakimiyyəti orqanının müəyyən etdiyi orqana (quruma) şikayət verilmədikdə vergi orqanı tərəfindən ƏDV depozit hesabından ƏDV üzrə vergi borcunun, faizlərin və tətbiq edilmiş maliyyə sanksiyalarının dövlət büdcəsinə alınması həyata keçirilir.

65.2.3-3. Vergi orqanının hesablamaları üzrə vergi ödəyicisi tərəfindən bu Məcəllənin 65.1-ci maddəsində göstərilən bildirişin alındığı tarixdən 30 təqvim günü müddətində məhkəməyə və ya müvafiq icra hakimiyyəti orqanının müəyyən etdiyi orqana (quruma) şikayət verildikdə bu Məcəllənin 65.2.3-1-ci maddəsinə uyğun olaraq dondurulmuş ƏDV depozit hesabından ƏDV üzrə vergi, faiz və tətbiq edilmiş maliyyə sanksiyası üzrə borcların alınması məhkəmənin qanuni qüvvəyə minmiş qərarına və ya müvafiq icra hakimiyyəti orqanının müəyyən etdiyi orqan (qurum) tərəfindən “İnzibati icraat haqqında” Azərbaycan Respublikasının Qanununa uyğun olaraq qəbul edilmiş qərara uyğun həyata keçirilir.

Vergi Qanunvericiliyi və Şərhlər Toplusu 2019 kitabı