Vergi ödəyicisi üçüncü şəxsə ziyan vurarsa, həmin xərc gəlirdən çıxılmalıdır?

Dövlət Vergi Xidməti suala aydınlıq gətirir

Sual:  A adlı şirkət təmir işi həyata keçirərkən, digər bir B adlı şirkətin əmlakına zərər vurarsa və o digər B adlı şirkət bu barədə məhkəməyə müraciət edib ziyana görə 8000 manat tələb edərsə, Məhkəmə də B adlı şirkətin lehinə qərar verib, A adlı şirkətin B adlı şirkətə 8000 manat ödəməsini tələb edərsə, A adlı şirkət bu məbləği ödədikdən sonra, bu 8000 manatı gəlirdən çıxılan xərcə sala bilərmi?

Cavab:   Vergi Məcəlləsinin 108-ci maddəsinə əsasən X fəsilə uyğun olaraq gəlirdən çıxılmayan xərclərdən başqa gəlirin əldə edilməsi ilə bağlı olan bütün xərclər, həmçinin qanunla nəzərdə tutulmuş icbari ödənişlər gəlirdən çıxılır.

Vergi Məcəlləsinin 119.1.2-ci maddəsi ilə gəlirin əldə edilməsi ilə şərtləndirilərək mülki hüquq müqavilələri üzrə faizlər, dəbbə pulu (cərimə), icranın gecikdirilməsi ilə əlaqədar vurulmuş zərərin əvəzinin ödənilməsi və digər analoji cərimələrin gəlirdən çıxılmasına məhdudiyyət qoyulmamışdır.