Sıfır (0) dərəcə ilə ƏDV tutulan əməliyyatlar üzrə əvəzləşdirmə necə tənzimlənir?

Satışı davam edən “Vergi uçotu: A-dan Z-yə” (VII nəşr) kitabından seçmə

Bölmənin əvvəlində qeyd etdiyimiz kimi, sıfır (0) dərəcə ilə ƏDV tutulan əməliyyatların ƏDV-dən azad olunan əməliyyatlardan əsas fərqi odur ki, bu tip əməliyyatlar ƏDV-yə cəlb olunan əməliyyatlar hesab edilir. Vergi Məcəlləsinin 175.7-ci maddəsinə əsasən, belə əməliyyatlar aparan şəxslər tərəfindən mallar (işlər, xidmətlər) alınarkən nağdsız qaydada (mal, iş və xidmət təqdim edənin bank hesabına birbaşa nağd qaydada ödənişlər istisna edilməklə) ƏDV-nin depozit hesabı vasitəsilə ödənilmiş ƏDV-nin məbləği bu Məcəllənin müddəalarına uyğun olaraq əvəzləşdirilir.

Misal 1. “A” MMC Böyük Britaniyanın ölkəmizdəki səfirliyinə 10 000 manat məbləğində mebel avadanlığı satır və bu əməliyyat ƏDV-yə sıfır (0) dərəcə ilə cəlb edilir. “A” MMC mebellərin daşınması üçün “S” MMC-yə 2 000 manat ödədiyinə görə 360 manat ƏDV öhdəliyi yaranır.

Vergi ödəyicisi Məcəllənin tələblərinə uyğun olaraq ödənişləri həyata keçirir. Daşınma ilə bağlı fəaliyyətin sıfır (0) dərəcəsi ilə ƏDV tutulan əməliyyatlara aid olmasına baxmayaraq həmin 360 manat ƏDV məbləğinin əvəzləşdirilməsinə icazə verilir.