XEYIRXAHLIQ MÜCƏSSƏMƏSİ

Gecə saat 3-də qapı döyülür. Arvad ərini göndərir ki, get, gör kimdi. Ər qapını açır, görür ki, qapıda bir kişi dayanıb. Kişi yazıq-yazıq danışmağa başlayır:

- Bağışlayın ki, gecənin bu vaxtı sizi narahat edirəm. İmkanınız varsa, gedək mənə, itələməyə kömək edin.

Ər dəli olur:

- Sənin başın xarabdı, bilirsən saat neçədi?

Qapını çırpıb yerinə uzanır. Arvadı soruşur ki, kim idi qapını döyən.Ər məsələni danışır. Bu dəfə arvad əsəbiləşir:

- Sənin adamlığın var? Yadındadı, maşınımız gecə yarısı xarab olmuşdu. Bərk də yağış yağırdı.Tanımadığımız bir cavan oğlan bizə bir saat kömək elədi. Maşını itələdi ki, işə düşsün.

Ər təzədən çar-naçar yerindən qalxır. Qapını açıb qışqırır:

- Eyyyy, sən getdin?

Qaranlıqdan səs gəlir:

- Yox, burdayam. Hara gedirəm ki, oturmuşam yelləncəkdə səni gözləyirəm, gəl itələ.