ƏDV depozit hesabından digər vergiləri ödəmək olar?

Sual: Müəssisənin Şəxsi Hesab Vərəqəsindəki ƏDV depozitdən digər vergiləri, məsələn yol, əmlak, mənfəət vergisini ödəyə bilərmi? Zəhmət olmasa, Vergi Məcəlləsindəki maddələri qeyd edərdiniz. Qabaqcadan təşəkkür edirəm.
Cavab:  Bildiririk ki, Nazirlər Kabinetinin 2007-ci il 30 dekabr tarixli, 219 nömrəli qərarı ilə təsdiq edilmiş «Vergi ödəyicisinə verilmiş elektron vergi hesab-fakturası üzrə alınmış malların (iş və xidmətlərin) dəyəri ödənilərkən ƏDV-nin ödənilməsi, ƏDV-nin depozit hesabında uçotun aparılması, ƏDV-nin hərəkəti, bu hesab üzrə aparılan əməliyyatlardan ƏDV-nin əvəzləşdirilməsi və dövlət büdcəsinə köçürülməsi Qaydaları»nın 3.1-ci bəndinə uyğun olaraq ƏDV üzrə vergi öhdəliyinin, faizlərin və tətbiq edilmiş maliyyə sanksiyalarının ödənilməsi ilə yanaşı, vergi ödəyicisinin rəsmi müraciətinə əsasən Vergilər Nazirliyi tərəfindən mərkəzləşdirilmiş qaydada hazırlanmış ödəniş tapşırığı ilə ƏDV-nin depozit hesabından pul vəsaitləri dövlət büdcəsinə köçürülür.
Qeyd edilən Qaydaların 4.2-ci bəndinə əsasən ƏDV sub-uçot hesabından ƏDV məbləğlərinin köçürülməsi aşağıdakı ardıcıllıqla aparılır:
- dövlət büdcəsinə;

- dövlət gömrük orqanlarının xəzinədarlıq orqanlarında açılmış müvafiq depozit hesabına;
- ƏDV sub-uçot hesablarına.
Eyni zamanda qeyd olunan Qaydanın 4.6-cı bəndinə əsasən vergi ödəyicisi tərəfindən ƏDV sub-uçot, naməlum sub-uçot hesabından dövlət büdcəsinə və dövlət gömrük orqanlarının xəzinədarlıq orqanlarında açılmış müvafiq depozit hesabına vergilər üzrə ödəniş həyata keçirilə bilər.
Göründüyü kimi, vergi ödəyicisi tərəfindən ƏDV sub-uçot hesabından dövlət büdcəsinə ƏDV üzrə vergi öhdəlikləri ilə yanaşı digər vergilərin, o cümlədən də mənfəət, əmlak, yol vergilərinin ödənilməsinə məhdudiyyət qoyulmur.

Mənbə:  Vergiler Nazirliyinin rəsmi veb saytı