Cavab: Sualınizla bağlı Əmək Məcəlləsinin 107-ci və 101-ci maddəsinə diqqət yetirək:

 

Maddə 107. İstirahət, səsvermə, iş günü hesab edilməyən bayram günlərində və ümumxalq hüzn günü işçilərin işə cəlb olunmasının yolverilməzliyi 

Bu Məcəllənin 101-ci maddəsinin «a» və «b» bəndlərində nəzərdə tutulmuş müstəsna hallar, habelə fasiləsiz istehsalatlar, ticarət, ictimai iaşə, rabitə, nəqliyyat və digər xidmət müəssisələri istisna olunmaqla, istirahət, səsvermə, iş günü hesab edilməyən bayram günlərində və ümumxalq hüzn günündə işçilərin işə cəlb olunması yolverilməzdir. 

 

Maddə 101. İş vaxtından artıq işlərə yol verilən müstəsna hallar 

1. İş vaxtından artıq işlərə yalnız aşağıdakı müstəsna hallarda yol verilir:

a) dövlətin müdafiəsinin təmin olunması üçün, habelə təbii fəlakətin, istehsal qəzasının qarşısını almaq və ya onların nəticələrini aradan qaldırmaq üçün yerinə yetirilməsi zəruri olan ən vacib işlərin görülməsinə;

b) su, qaz və elektrik təchizatı, isitmə, kanalizasiya, rabitə və digər kommunal müəssisələrində işlərin, xidmətlərin pozulmasına səbəb olan gözlənilməz hadisələrin nəticələrini aradan qaldırmaqdan ötrü zəruri işlərin görülməsini təmin etmək üçün;

Gördüyünüz kimi Məcəllədə konkret yazılıb ki, bayram günlərində işçinin işə cəlb olunması qadağandır. Ancaq 101-ci maddədə nəzərdə tutulan hallardan başqa. Belə başa düşürəm ki, sizin işlədiyiniz təşkilat həmin maddədə göstərilən işlərdə çalışmır, təşkilatınızda hər hansı bir istehsalat qəzası baş verməyib, təbii fəlakət olmayıb. Odur ki, sizin bayram günlərində işə cəlb olunmağınız, sonradan isə dalbadal 5 gün istirəhət etməyiniz düzgün deyil. Məntiqlə sizin dediyiniz halda ümumi iş günlərinin miqdarı dəyişmir, yəni ayın 9-u işləyib, sonradan onun əvəzində ayın 15-i istirahət edirsiniz. Sual oluna bilər ki, bəs onda bayram günü nəyə lazımdır. Dövlətimiz həmin günü bayram günü elan edir ki, xalq istirahətdən əlavə həmin günü bayram etsin. Ona görə də bayram günündə işləmək olmaz, əks halda bu bayram günü yox, sadəcə istirahət günü kimi qəbul olunardı.