Yeni Dəyişiklik! İşəgötürənlər hansı sənədləri 10 iş gün ərzində mütləq olaraq DƏMX-ə göndərməlidir?

Azərbaycan Respublikası Prezidenti İlham Əliyevin imzaladığı 23 iyun 2023-cü il tarixli “Azərbaycan Respublikasının Əmək Məcəlləsində dəyişiklik edilməsi haqqında Azərbaycan Respublikasının Qanunu”na əsasən, Əmək Məcəlləsinə yeni dəyişiklik həyata keçirilib.Dəyişikliyə əsasən, Əmək Məcəlləsinin 64-cü maddəsinin 1-ci hissəsinə “keçirilməsini” sözündən sonra “və attestasiyanın aparılması nəticələrinə dair sənədlərin surətinin 10 iş günü müddətində məlumat üçün müvafiq icra hakimiyyəti orqanının müəyyən etdiyi orqana (quruma) təqdim olunmasını” sözləri əlavə edilib.

Beləliklə, Əmək Məcəlləsinin 64-cü maddəsinin birinci hissəsinə aşağıdakı kimi təsdiq edilib:

1. Bu maddənin ikinci hissəsində nəzərdə tutulan məqsədlə əmək şəraitindən asılı olmayaraq işəgötürən müvafiq normativ hüquqi aktla müəyyən edilmiş qaydada iş yerlərinin attestasiyasının keçirilməsini və attestasiyanın aparılması nəticələrinə dair sənədlərin surətinin 10 iş günü müddətində məlumat üçün müvafiq icra hakimiyyəti orqanının müəyyən etdiyi orqana (quruma) təqdim olunmasını təmin etməlidir.

Prezidentin fərmanına əsasən, 64-cü maddənin birinci hissəsindəki müvafiq icra hakimiyyəti orqanı olaraq Dövlət Əmək Müfəttişliyi Xidməti qismində Azərbaycan Respublikasının Əmək və Əhalinin Sosial Müdafiəsi Nazirliyi müəyyən edilib.

Dəyişiklikdən sonra işəgötürən iş yerlərinin attestasiyasının aparıması nəticələrinə dair sənədlərin surətini 10 iş günü ərzində DƏMX -ə göndərməsi artıq məcburi yəni imperativ norma hesab edilir.