Prezidentin təsdiq etdiyi Dövlət Proqramı: SADƏLƏŞDİRİLMİŞ Vergi sistemi LƏĞV olunaraq ƏDV Sistemi ilə Əvəzləşdirilsin

Azərbaycan Respublikası Prezidenti İlham Əliyevin 2018-ci il 26 sentyabr tarixli Sərəncamı ilə “2018–2020-ci İLLƏRDƏ AZƏRBAYCAN RESPUBLİKASINDA RƏQƏMSAL ÖDƏNİŞLƏRİN GENİŞLƏNDİRİLMƏSİ ÜZRƏ DÖVLƏT PROQRAMI” təsdiq edilib.  
Dövlət Proqramının strateji məqsədi vətəndaş, biznes subyektləri və dövlət strukturları arasında nağdsız ödəniş mühitinin xeyli genişlənməsi, nağd dövriyyənin həcminin minimuma endirilməsi və nəticədə bank sektorunun maliyyə resursları bazasının gücləndirilməsidir.

Həmkarlarımız üçün «RƏQƏMSAL ÖDƏNİŞLƏRİN İNSTİTUSİONAL MÜHİTİNİN DAHA DA YAXŞILAŞDIRILMASI» bölməsinin  “Vergi sisteminin effektivliyinin artırılması” bəndi maraqlı olacağını nəzərə alaraq, bəzi məlumatlara aydınlıq gətirmək istəyirik.

Dövlət Proqramında qeyd edilir ki, sadələşdirilmiş verginin seçilməsi imkanı iqtisadiyyatda nağd ödənişləri də stimullaşdırır: «Vergi ödəyicilərinin 97%-nin sadələşdirilmiş vergi ödəyicisi olmasına baxmayaraq, ümumi vergi daxilolmalarında sadələşdirilmiş vergi daxilolmalarının xüsusi çəkisi 2017-ci ildə cəmi 5,3% təşkil etmişdir (2016 – 4,3%, 2015 – 2,4%, 2014 – 2,2%, 2013 – 1,8%).  Nümunəvi dünya təcrübəsinə uyğun olaraq kiçik sahibkarlıq subyektlərinin də tədricən ƏDV ödəyicisinə çevrilməsi vergidən yayınmanın, habelə nağd hesablaşmalara olan motivlərin aradan qalxmasına gətirib çıxarmış olar.”

Dövlət proqramında həmçinin sadələşdirilmiş vergi sisteminin ləğvi ilə bağlı görüləcək tədbirlər də qeyd edilib:

Tədbir 1.2.4. Sadələşdirilmiş vergi sisteminin tədricən ƏDV sistemi ilə əvəzləşdirilməsi və ƏDV dərəcəsinin diferensiallaşdırılması

• Təsərrüfat subyektlərinin sadələşdirilmiş vergi sistemindən ƏDV sisteminə mərhələli keçid mexanizminin hazırlanması;
• Müxtəlif sektorlar və ölçüsündən asılı olaraq təsərrüfat subyektləri üçün mərhələli yanaşma planı tərtib edilməsi;
• Keçiddən sonra ƏDV-nin diferensiallaşdırılması.