RƏSMİ! Vergi Məcəlləsinə edilən son dəyişiklik nəticəsində hansı hallar üzrə ƏDV-dən azadolma tətbiq edildi?

Azərbaycan Respublikası Prezidenti İlham Əliyevin imzaladığı 16 iyun 2023-cü il tarixli  “Azərbaycan Respublikasının Vergi Məcəlləsində dəyişiklik edilməsi haqqında Azərbaycan Respublikasının Qanunu”na əsasən Vergi Məcəlləsinə dəyişiklik edilib. Dəyişikliyin şərhini təqdim etmədən öncə,  əlavə və dəyişikliyin mətnini təqdim edirik:

1. Aşağıdakı məzmunda 164.1.41-3-cü maddə əlavə edilsin:

“164.1.41-3. Azərbaycan Respublikasının ərazisində istehsal olunan minik avtomobillərinin satışı – 2023-cü il mayın 1-dən 10 il müddətinə;”.

2. 164.1.56-cı maddədən “minaaxtaran itlərin,” sözləri çıxarılsın və həmin maddədə “idxalı – 2021-ci il oktyabrın 15-dən” sözləri “, onların yaradılması və (və ya) istehsalı üçün texnologiyaların, avadanlıqların, dəstləşdirici hissələrin və xammalın, habelə minaaxtaran itlərin idxalı – 2023-cü il martın 1-dən” sözləri ilə əvəz edilsin.
3. Aşağıdakı məzmunda 164.1.56-1-ci maddə əlavə edilsin:

“164.1.56-1. müvafiq icra hakimiyyəti orqanının müəyyən etdiyi orqanın (qurumun) təsdiqedici sənədi əsasında Azərbaycan Respublikasının işğaldan azad edilmiş ərazilərinin, habelə müharibə və hərbi əməliyyatların təsirinə məruz qalmış digər ərazilərin minalardan və partlamamış hərbi sursatdan, tərkibində partlayıcı olan qurğulardan və digər partlayıcı qalıqlardan təmizlənməsi çərçivəsində bütün növ texnikanın, avadanlıqların, texniki vasitələrin və qurğuların, onların ehtiyat hissələrinin, fərdi zirehli qoruyucu geyimlərin, alətlərin, partlayıcı və pirotexniki vasitələrin istehsalı və satışı – 2023-cü il martın 1-dən 5 il müddətinə;”.

Dəyişiklikdən göründüyü kimi Vergi Məcəlləsinin ƏDV-lə bağlı fəslinə aid olan “Vergi ödəməkdən azad edilmə” adlı 164-cü maddəsinə dəyişikliklər həyata keçirilib.

İlk dəyişikliyin mahiyyəti ondan ibarətdir ki, 2023-cü ilin mayın 1-dən 10 il müddətinə Azərbaycan Respublikasının ərazisində istehsal olunan minik avtomobillərinin satışına ƏDV tətbiq edilməyəcək.

İkinci və sonuncu dəyişikliklər isə minaaxtarma fəaliyyəti ilə bağlıdır. Dəyişikliyə əsasən, Vergi Məcəlləsinin 164.1.56-ci maddəsi aşağıdakı kimi formalaşır:

164.1.56. müvafiq icra hakimiyyəti orqanının müəyyən etdiyi orqanın (qurumun) təsdiqedici sənədi əsasında Azərbaycan Respublikasının işğaldan azad edilmiş ərazilərinin, habelə müharibə və hərbi əməliyyatların təsirinə məruz qalmış digər ərazilərin minalardan və partlamamış hərbi sursatdan, tərkibində partlayıcı olan qurğulardan və digər partlayıcı qalıqlardan təmizlənməsi çərçivəsində bütün növ texnikanın, avadanlıqların, texniki vasitələrin və qurğuların, onların ehtiyat hissələrinin, fərdi zirehli qoruyucu geyimlərin, alətlərin, partlayıcı və pirotexniki vasitələrin , onların yaradılması və (və ya) istehsalı üçün texnologiyaların, avadanlıqların, dəstləşdirici hissələrin və xammalın, habelə minaaxtaran itlərin idxalı – 2023-cü il martın 1-dən 5 il müddətinə.

Sonuncu dəyişiklik isə Vergi Məcəlləsinə 164-cü maddəsinə edilən yeni əlavədir. Məcəlləyə edilən 164.1.56-1-ci maddəsinə edilən əlavəyə əsasən, müvafiq icra hakimiyyəti orqanının müəyyən etdiyi orqanın (qurumun) təsdiqedici sənədi əsasında Azərbaycan Respublikasının işğaldan azad edilmiş ərazilərinin, habelə müharibə və hərbi əməliyyatların təsirinə məruz qalmış digər ərazilərin minalardan və partlamamış hərbi sursatdan, tərkibində partlayıcı olan qurğulardan və digər partlayıcı qalıqlardan təmizlənməsi çərçivəsində bütün növ texnikanın, avadanlıqların, texniki vasitələrin və qurğuların, onların ehtiyat hissələrinin, fərdi zirehli qoruyucu geyimlərin, alətlərin, partlayıcı və pirotexniki vasitələrin istehsalı və satışı – 2023-cü il martın 1-dən 5 il müddətinə ƏDV-dən azad edilir.  Beləliklə, Azərbaycan Respublikasının Minatəmizləmə Agentliyinin təsdiq edici sənədi əsasında yuxarıda qeyd edilən malların istehsalı və statışı ƏDV-dən azad edilir.