Azərbaycanın Dövlət Vergi Xidməti milli vergi sistemində mütərəqqi təcrübələrin tətbiqi, eyni zamanda, Vergi Xidmətinin beynəlxalq əlaqələrinin genişləndirilməsi istiqamətində ən müxtəlif beynəlxalq platformalardan istifadə edir. Dünyada vergi inzibatçılığında baş verən yenilikləri izləmək və tətbiq etmək, beynəlxalq vergitutma sahəsində son proseslər və tendensiyaları öyrənmək, qarşılıqlı məlumat mübadiləsini təmin etmək istiqamətində çoxtərəfli əməkdaşlıq, xüsusilə də Azərbaycan Avropadaxili Vergi Administrasiyaları Təşkilatı (İOTA) və bu kimi digər təşkilatlarla əlaqələr müstəsna rol oynayır. Azərbaycan IOTA-ya üzv olduqdan sonra bizim əsas məqsədlərimizdən biri təkcə bu strukturda təmsil olunmaq deyil, həm də Azərbaycanı beynəlxalq vergitutma sahəsində təcrübə mübadiləsi mərkəzlərindən birinə çevirməkdir.
Bu sözləri AZƏRTAC-a müsahibəsində Azərbaycan Respublikasının İqtisadiyyat Nazirliyi yanında Dövlət Vergi Xidmətinin rəisi Orxan Nəzərli söyləyib.
Onun sözlərinə görə, Dövlət Vergi Xidməti 2002-ci ildən etibarən IOTA-nın tam hüquqlu üzvüdür. IOTA ilə əməkdaşlığımızın başlandığı andan Azərbaycanın vergi xidməti bu strukturun fəaliyyətində aktiv iştirak edib. Həmçinin, ötən dövrlərdə IOTA-nın müxtəlif səviyyəli tədbirlərinin ölkəmizdə keçirilməsi üçün iş aparılıb. İndiyədək Bakıda kifayət qədər yüksək səviyyəli beynəlxalq tədbirlər, IOTA-nın İşçi Qrupunun iclasları, müxtəlif forumları, İcraiyyə Şurasının iclasları və OECD ilə birgə tədbirləri keçirilib. Biz bu tendensiyanın saxlanması və gələcəkdə də bu kimi tədbirlərin Bakıda təşkil olunması imkanlarını nəzərdən keçiririk.
O.Nəzərli qeyd edib ki, Azərbaycan tərəfi bu platformanı beynəlxalq təcrübənin öyrənilməsi və milli vergi sistemində tətbiqi baxımından olduqca faydalı hesab edir. Buna görə də, IOTA tərəfindən təşkil edilən bir çox tədbirlərdə DVX əməkdaşlarının iştirakı davamlı olaraq təmin olunur.
“Bunu bizim IOTA ilə əməkdaşlığa olan marağımızın göstəricisi hesab etmək olar”, – deyə O.Nəzərli vurğulayıb.
.jpg)
0 Komment
Şərh yazın