Əvəz Quliyev: “Media subyektləri alış zamanı ödənilmiş əlavə dəyər vergisini əvəzləşdirə bilməz”

Vergi Məcəlləsində edilmiş dəyişikliklərlə 2023-cü il yanvarın 1-dən media subyektlərinə bir sıra vergi güzəşt və azadolmaları verilib. İqtisadiyyat Nazirliyi yanında Dövlət Vergi Xidmətinin Vergi siyasəti baş idarəsinin rəis müavini Əvəz Quliyev Dövlət Vergi Xidmətinin ATV kanalı ilə birgə layihəsi olan “İqtisadi zona” proqramında bununla bağlı bəzi məsələlərə aydınlıq gətirib.

Əvəz müəllim media subyektlərinin güzəştləri ilə bağlı ən çox rast gəlinən suala da aydınlıq gətirib: “Əsas suallardan da biri ondan ibarətdir ki, media subyektləri hesab edirlər ki, alışları üzrə, yəni digər şəxslərdən mal alışı, iş, xidmət alışı həyata keçirərkən onlar əlavə dəyər vergisindən azad olunurlar. Bu fikir yanlışdır, çünki qanunla onlara verilən azadolma onların istehsal etdikləri media məhsullarının təqdim edilməsindən əldə etdikləri gəlirlərə tətbiq olunur. Onların alışları üzrə çəkdiyi xərcləri isə, yəni fəaliyyətləri üzrə müxtəlif növ mal (iş, xidmət) aldıqları zaman ödəməli olduqları əlavə dəyər vergisindən azadolma nəzərdə tutulmur. Həmin əlavə dəyər vergiləri alış üzrə xərclərdə ümumi qaydada ödənilir və onun təqdim edilməsi və satışı media subyektləri tərəfindən sonrakı mərhələdə hazır məhsul olaraq ƏDV-dən azad olunduğu üçün burada artıq alış zamanı ödənilmiş əlavə dəyər vergisi əvəzləşdirilmir”