Hökumətdən bəzi dövlət qulluqçularının dövlət qulluğuna xitam verilməsi barədə açıqlama

Dəyişiklik 2001-ci ildən sonra bu vəzifələrdə çalışan dövlət qulluqçularına şamil olunur

Azərbaycanda 2001-ci ildən sonra yerli icra hakimiyyəti orqanlarında inzibati vəzifə tutan orta təhsilli dövlət qulluqçularının hamısının dövlət qulluğuna xitam veriləcək.
Prezident yanında Dövlət Qulluğu Məsələləri üzrə Komissiyanın hüquq sektorunun müdiri Vüqar Əsgərov Trend-ə bildirib ki, yerli icra hakimiyyəti orqanlarında inzibati vəzifələrdə çalışan orta təhsilli şəxslərin işdən azad olunması prosesinə başlanıb.
Sektor müdirinin sözlərinə görə, bu ilin iyununda "Yerli icra hakimiyyəti orqanları haqqında Əsasnamə"yə əlavə və dəyişikliklər edilib.
"Yeni Əsasnamənin qəbulundan sonra bu orqanlarda inzibati vəzifə tutan orta təhsilli dövlət qulluqçularının dövlət qulluğuna xitam verilib. "Dövlət qulluğu haqqında" qanunda inzibati vəzifələr və onlara tələblər konkret müəyyən edilib. Qanunun tələbinə uyğun olaraq, ali təhsili olmayanların dövlət qulluğuna xitam verilir", - sektor müdiri deyib.
Onun sözlərinə görə, əgər şəxs "Dövlət qulluğu haqqında" qanunun qəbulundan, yəni 2001-ci ildən əvvəl bu vəzifədə işləyirsə, bu dəyişiklik onlara şamil olunmur və onların dövlət qulluğuna xitam verilmir.

"Dəyişiklik 2001-ci ildən sonra bu vəzifələrdə çalışan dövlət qulluqçularına şamil olunur. Xitam qərarını həmin şəxslərin çalışdıqları icra hakimiyyəti orqanının rəhbəri verir", - Əsgərov deyib.
Sektor müdiri bildirib ki, Komissiyada yerli icra hakimiyyəti orqanlarında inzibati vəzifə tutan orta təhsilli şəxslərin sayı barədə məlumat yoxdur.
Həmin vəzifələrə qəbulun müsahibə yolu ilə həyata keçirildiyini deyən DQMK rəsmisi bildirib ki, həmin dövlət qulluqçularının vəzifədən çıxarılması sözügedən qurumların fəaliyyətində problem yaratmayacaq.
"Çünki, bu, kütləvi xarakter daşımır. Belə vəzifəli şəxslər əsasən icra hakimiyyəti nümayəndəliklərindədir. Onların sayı isə hər nümayəndəlikdə 1-2 nəfər ola bilər", - Əsgərov qeyd edib.