Orta ixtisas təhsili müəssisələrinə imtahanın nəticələri yaxın günlərdə açıqlanacaq

Tələbə Qəbulu üzrə Dövlət Komissiyası (TQDK) sentyabrın 2-də cari tədris ili üçün ümumi orta təhsil bazasında (9 illik) orta ixtisas təhsili müəssisələrinə qəbul imtahanı keçirib.

TQDK-nın mətbuat xidmətindən Lent.az-a verilən məlumata görə, qəbul imtahanı Bakı şəhəri ilə yanaşı Naxçıvan, Gəncə, Sumqayıt, Mingəçevir, Şəki, Ağcabədi, Göyçay, Şirvan, Salyan, Lənkəran və Xaçmaz şəhərlərində də keçirilib.
İmtahan bütün binalarda eyni vaxtda - saat 11:00-da başlanıb. İmtahan prosesinin idarə olunması üçün Komissiyada operativ qərargah fəaliyyət göstərib, imtahanın keçirildiyi bütün binalarla müntəzəm olaraq əlaqə saxlanmış və imtahanın gedişi nəzarətdə saxlanıb. Bütün binalarda imtahan təlimata uyğun şəkildə keçirilib, abituriyentlərin normal qaydada imtahan vermələri üçün hər cür şərait yaradılıb. Hazırda Komissiyada imtahan protokollarının və cavab kartlarının emal prosesi aparılır. Nəticələrin yaxın günlərdə elan edilməsi nəzərdə tutulur.