Bakıda bağlanan küçə və prospektlərin siyahısı açıqlanıb

Bakıda əsaslı təmir işləri ilə əlaqədar olaraq bağlanan küçə və prospektlərin siyahısı açıqlanıb.

Nəqliyyat Nazirliyi Nəqliyyatı İntellektual İdarəetmə Mərkəzindən (NİİM) Trend-ə daxil olan məlumata görə, təmir işləri və yeni asfalt örtüyünün salınması ilə əlaqədar olaraq bir sıra yollar bağlanıb.

Avqustun 29-na olan məlumata görə, NİİM Neftçilər prospektində, Afiyəddin Cəlilov küçəsində, Əziz Əliyev küçəsində, Bülbül prospektinin Zərifə Əliyeva və Neftçilər prospekti ilə kəsişməsi istiqamətində təmir işlərinin aparılması ilə əlaqədar olaraq həmin küçə prospektlərin tamamilə bağlanması barədə əhaliyə xəbərdarlıq edir.

Bundan başqa, Abbas Mirzə Şərifzadə küçəsinin Nazim Hikmət küçəsi ilə kəsişməsindən "Kaktus" restoranı istiqamətində hərəkət hissəsi bağlı olduğu üçün həmin yolun əks hərəkət hissəsi 2 istiqamətli olub.

Yasamal rayonu, Qələbə dairəsindən Əsəd Əhmədov küçəsi istiqamətində yol bağlı olduğu üçün həmin yolun əks hərəkət hissəsi 2 istiqamətli olub. Ü.Hacıbəyov küçəsində hərəkət hissəsi müvəqqəti 2 istiqamətli olduğundan isə K.Səfərəliyeva və Rixard Zorge küçələri bağlanıb.

Həmçinin, Rəşid Behbudov küçəsinin Zərifə Əliyeva və Neftçilər prospekti ilə kəsişməsi istiqaməti və Niyazi küçəsi tamamilə bağlıdır. NİİM paytaxt yollarında aparılan təmir işləri ilə əlaqədar olaraq sürücülərə alternativ yollardan istifadə etməyi tövsiyə edir.

Qeyd edək ki, Nəqliyyatı İntellektual İdarəetmə Mərkəzi 2011-ci ilin sonundan etibarən fəaliyyət göstərir. Mərkəzin əsas məqsədi ölkə yollarında nəqliyyatın hərəkətinin tənzimlənməsi və problemlərin aradan qaldırılmasıdır.