İqtisadi İnkişaf Nazirliyi "AccessBank"ı müştəriləri aldatmaqda günahlandırdı

Banka 14,2 min manat maliyyə sanksiyası tətbiq edilib

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən reklam yayımı sahəsində aparılan monitorinqlər zamanı "AccessBank-da kredit al... Avropa çempionatına vəsiqə qazan! Heç kim uduzmayacaq!" məzmunlu reklamın yayımlandığı müəyyən edilib.
Nazirliyin mətbuat xidmətindən Trend-ə verilən məlumata görə, ilkin araşdırma zamanı qeyd olunan reklamın mətnində həqiqətə uyğun olmayan, qeyri-dəqiq və istehlakçıların seçmə sərbəstliyinə təsir göstərən məlumatların olması əlamətləri aşkar edildiyindən "AccessBank" QSC barəsində antiinhisar qanunvericiliyinin tələblərinin pozulması əlamətləri üzrə iş qaldırılıb.

Dövlət Xidmətində işə baxılması zamanı "AccessBank" QSC-nin sifarişi əsasında yayımlanan "AccessBank-da kredit al... Avropa çempionatına vəsiqə qazan! Heç kim uduzmayacaq!" məzmunlu reklamın qeyri-dəqiq və bilərəkdən yalan reklam olduğu müəyyən edilib. Belə ki, qeyd olunan reklamda istehlakçıya "AccessBank"dan kredit alacağı təqdirdə Avropa çempionatına vəsiqə əldə edəcəyi bildirildiyi halda, faktiki olaraq kampaniya çərçivəsində bankdan kredit almış müştərilərin yalnız 12 nəfərinin Avropa çempionatına vəsiqə (bilet) qazandığı müəyyən edilib.
Bununla əlaqədar olaraq, reklam yayımı zamanı antiinhisar və reklam qanunvericiliyinin tələblərinə əməl edilməsi barədə "AccessBank" QSC-yə icrası məcburi göstəriş verilib və "Haqsız rəqabət haqqında" Azərbaycan Respublikası Qanununun tələblərini pozduğuna görə 14,2 min manat maliyyə sanksiyası tətbiq edilib.