Bu da qəhrəman: 700 bal toplayan Kamil Sərdarlının müsahibəsi

IV ixtisas qrupu üzrə ən yüksək nəticə göstərən - 700 bal toplayan abituriyent Kamil Hüseyn oğlu Sərdarlı sevinc hisslərini Modern.az-la bölüşüb. Ölkə üzrə rekord nəticə qazanan Kamil Sərdarlı 700 bal topladığı üçün çox sevindiyini və bunun üçün valideynlərinə borclu olduğunu bildirib. Türkiyə Diyanət Vəqfi Bakı Türk Liseyinin məzunu olan K.Sərdarlı 700 bal toplamağın onun üçün gözlənilməz olmadığını bildirib.
“Bu mənim üçün çox gözəl hisslərdir. Özümü xoşbəxt hiss edirəm.  Təbii ki, mənim 700 bal toplamağımdan oxuduğum məktəbin və eləcə də valideynlərimin rolu böyük olub. Onlar həmişə mənə dəstək veriblər. Bu baxımdan deyə bilərəm ki, valideynlərim hər zaman mənə güvəndiklərini deyirdilər. Bu da məni daha da ruhlandırırdı. Çox sevinirəm ki, ölkə üzrə ən yüksək nəticəni mən və mənim sinif yoldaşın göstərib. Biz qabaqcadan çox ciddi hazırlaşırdıq. Təvazökarlıqdan uzaq olsa da, deyə bilərəm ki, mən 700 bal toplayacağıma əmin idim”, - deyə K.Sərdarlı vurğulayıb.

Test suallarının çətin olmadığını deyən K.Sərdarlı gələcəkdə həkim olmaq istədiyini və hətta indidən seçimini etdiyini qeyd edib:
“Suallar çox çətin deyildi. Mən yüksək nəticə göstərəcəyimi bilirdim. Sözün açığı imtahandan sonra biz ikimiz də bilirdik ki, 700 bal toplamışıq. Amma bilməzdim ki, Azərbaycanda IV qrup üzrə yalnız sinif yoldaşımla mən belə nəticə göstərəcəyik.
Mən bir daha əldə etdiyim uğura görə müəllimlərimə, məktəbimizin direktoruna və ən əsası  valideynlərimə minnətdarlığımı bildirirəm.
Universitetə hazırlaşarkən mənim bir məqsədim var idi, o da həkim olmaq idi. Allaha çox şükür arzuma çatdım. Mən Tibb Universitetinin Müalicə işi fakültəsinə qəbul olmaq istəyirəm. İnşallah, bundan sonra imkanım olarsa, xaricdə də təhsil almaq niyyətindəyəm. Mən bir daha universitetə hazırlaşan abituriyentlərə müraciət edərək onlara uğurlar arzu edirəm. Təbii ki, uğur qazanmaq insanın öz əlindədir. Bunun üçün isə çalışmaq lazımdır”.
Qeyd edək ki, Tələbə Qəbulu üzrə Dövlət Komissiyasının elan etdiyi nəticələrə görə, IV ixtisas qrupu üzrə ən yüksək nəticələri Türkiyə Diyanət Vəqfi Bakı Türk Liseyinin məzunları - Kamran Elçin oğlu Həmidov və Kamil Hüseyn oğlu Sərdarlı göstərib. Onlar sinif yoldaşıdırlar.