Tələbə Qəbulu üzrə Dövlət Komissiyası tərəfindən 2012-2013-cü tədris ili üçün ali təhsil müəssisələrində magistratura səviyyəsi üzrə 6021 plan yerinə qəbul olmaq üçün keçirilən imtahanın II mərhələsində iştirak edən 8370 bakalavrın 6763-ü ixtisaslaşma seçimində iştirak etmək hüququ qazanıb.

Komissiyadan çərşənbə günü Trend-ə verilən məlumata görə, 2012-2013-cü tədris ili üçün ali təhsil müəssisələrinin magistratura səviyyəsinə qəbulda bakalavrların ixtisaslaşma seçimi imkanları genişləndirildiyinə görə 19 (ekologiya, kimya və biologiya), 27 (pedaqogika), 35 (torpaqşünaslıq, aqrokimya) və 54 (bədən tərbiyəsi) saylı qəbul proqramları üzrə müsabiqə vəziyyəti əvvəlki illərlə müqayisədə yaxşılaşıb.

 

26 saylı (istiqsadiyyat) qəbul proqramı üzrə imtahan vermiş bakalavrların ixtisas üzrə göstərdiyi nəticələr zəif olduğuna görə ixtisaslaşmaların ödənişli yerlərinin müsabiqəsinə buraxılmaq üçün ixtisas üzrə minimal balı 15-ə endirmək qərara alınıb.