Bu dəyişiklikdən sonra yeni yaranan sahibkarlıq subyektlərinə dövlət tərəfindən xüsusi yanaşma olacaq

 

““Sahibkarlıq fəaliyyəti haqqında” qanuna edilən dəyişikliyə görə,  Azərbaycanda sahibkarlıq 4 cür olacaq. Belə ki, qanuna əlavə edilən yeni maddəyə görə, sahibkarlıq subyektləri mikro, kiçik, orta və iri sahibkarlıq subyektlərinə bölünəcək”.

Bu sözləri Modern.az-a açıqlamasında Milli Məclisin İqtisadi siyasət, sənaye və sahibkarlıq komitsəinin üzvü Vahid Əhmədov deyib.

Deputat bildirib ki, qanuna edilmiş dəyişiklikdə əsas məqsəd mikro sahibkarlara dövlət tərəfindən yardım etməkdir.

“Ümumi göstəricilərə baxanda Azərbaycanda kiçik sahibkarlıq da çox az inkişaf edir. Ancaq orta və iri sahibkarlıq inkişaf edib. Mikro sahibkarlığa yardım etmək üçün qanuna bu dəyişiklik edilir. Azərbaycanda mikro sahibkarlıqla məşğul olan insanların sayı da çoxdur. Onlar hələ ki faktiki olaraq kiçik sahibkar kimi gedirlər. Yeni dəyişiklik onlara hüquqi yardım etmək məqsədi daşıyır”.

V.Əhmədov bildirib ki, mikro sahibkarlıqla məşğul olan insanlara dövlət tərəfindən müəyyən güzəştlər tətbiq ediləcək.

“Dövlət hər zaman sahibkarlara güzəştlər edir. Onlara bəzi kreditlər güzəştlə verilir. Yəni bank kreditləri adi insanlara 25-30 faizlə verilirsə, sahibkarlara 7 faizlə verilir. Kənd təsərrüfatı ilə məşğul olanlar torpaq vergisindən başqa bütün vergilərdən azad edilib. Bu hər zaman dövlət başçısının diqqətində olan məsələlərdir.  Kiçik, orta və iri sahibkarlıqla məşğul olan şəxslərə edilən güzşətlər mikro sahibkarlıqla məşğul olan şəxslərə də tətbiq ediləcək”.

Qeyd edək ki, “Sahibkarlıq fəaliyyəti haqqında” qanuna edilən dəyişiklik Milli Məclisin dekabrın 29-da keçiriləcək iclasında müzakirə ediləcək.