700 bal toplayan daha bir xanımın təqdimatı

 Nərmin Məmmədli: " Bizim bölgədən yeganə 700 bal toplayan mənəm..."

İyulun 14-də III ixtisas qrupu üzrə keçirilən qəbul imtahanlarında 4 abituriyent maksimal nəticə əldə edərək 700 bal toplayıb. Modern.az onlardan daha birini –Nərmin Məmmədlini təqdim edir.

Məmmədli Nərmin Rövşən qızı Mingəçevir şəhəri 3 saylı şəhər orta məktəbini bitirib.

Hazırda 700 bal toplamağın sevincini yaşayan Nərmin hər zaman sınaqlarda yüksək nəticələr göstərdiyini deyib.
“700 balı əvvəlcən hədəfləmişdim və buna da nail oldum. Hazırda valideynlərimə, yaxınlarıma bu sevinci yaşatdığıma görə sevinirəm. Bizim bölgədən yeganə 700 bal toplayan mənəm. Ümumiyyətlə, sınaqlardan hər zaman yüksək nəticələr göstərmişəm və 600-dən yuxarı bal toplamışam”.

N. Məmmədli bu nəticəyə nail olmaq üçün iki il ciddi şəkildə hazırlaşdığını vurğulayıb. “Repetitor yanına getmişəm, əsasən məktəb müəllimlərim məni hazırlaşdırıb və onların hər birinə öz minnətdarlığımı bildirirəm”.

Orta məktəbdə hər zaman yüksək qiymətlərlə oxuyan N.Məmmədli adının qızıl medal alacaq namizədlər siyahısına yazıldığını bildirib. “Adım yazılıb, amma hələ ki bir nəticə yoxdur, gözləyirik”.
N.Məmmədlinin hədəfi isə hüquqşünas olmaqdır. “Prezident yanında Dövlət İdarəçilik Akademiyasında oxumaq istəyirəm. Amma xaricə getmək də planlarım var. Əgər bu reallaşarsa, təhsilimi xaricdə davam etdirəcəyəm. Ən çox oxumaq istədiyim ölkələr isə Amerika və İngiltərədir”.