ŞAD XƏBƏR OLACAQMI? Hansı tip batmış əmanətlərin geri qaytarıla bilər?

Azərbaycanın müstəqilliyinin ilk illərində kommersiya banklarında batan əmanətlərin qaytarılması istisna olunmur.

APA-nın məlumatına görə, bunu jurnalistlərə açıqlamasında Milli Məclisin İqtisadi siyasət Komissiyasının üzvü Vahid Əhmədov bildirib.

 Millət vəkili qeyd edib ki, müstəqilliyin ilk dövründə - 1992-ci və sonrakı illərdə vətəndaşların banklarda olan əmanətlərinin qaytarılması məsələsinə baxıla bilər: «Bu, hazırda hökumətin gündəliyində olmasa da, gələcəkdə bu məsələyə baxıla bilər. Artıq bununla bağlı istər Milli Məclisə, istərsə də hökumətə müraciətlər daxil olmaqdadır. Sadəcə olaraq, biz bunun miqdarını, həcmini hələ müəyyənləşdirməmişik».
 V.Əhmədov bildirib ki, bu gün Azərbaycanın iqtisadi potensialı vətəndaşların bu əmanətlərini də qaytarmağa imkan verir: «Bu əmanətlər onsuzda SSRİ dövründə batan əmanətlərdən qat-qat azdır. Həll olunması lazım olan yeganə məsələ bunun həcmini hesablayıb tapmaqdır».