“Dövlət rüsumu haqqında” qanun layihəsinə dəyişikliklər olacaq

Nəqliyyat vasitələrinin illik texniki baxışdan keçirilməsinə görə dövlət rüsumunun məbləği 2 dəfə artırılır

Azərbaycan Milli Məclisinin İqtisadi siyasət Komitəsinin bu gün keçirilən iclasında «Dövlət rüsumu haqqında» qanun layihəsinə dəyişikliklər müzakirəyə çıxarılıb.  
 APA-nın məlumatına görə, qanun layihəsi barədə komitə sədri Ziyad Səmədzadə məlumat verib.

Qanunda edilən dəyişikliyə görə, nəqliyyat vasitələrinin illik texniki baxışdan keçirilməsinə görə dövlət rüsumunun məbləğinin 10 manatdan 20 manata qaldırılması təklif olunur. Motonəqliyyat vasitələri, traktor, tikintidə, meşə və kənd təsərrüfatında, başqa işlərdə istifadə üçün nəzərdə tutulan özügedən maşınlar, texnoloji, yarış məqsədli idman və digər mexaniki nəqliyyat vasitələri, qoşqular, yarımqoşqular üçün nəzərdə tutulan rüsum 5 manatdan 10 manata qaldırılacaq. Nəqliyyat vasitələrinin texniki uçot göstəricilərinə dəyişikliklər edilməsi zamanı və ya nəqliyyat vasitəsi alıcısının tələbi ilə nəqliyyat vasitələrinə texniki baxış keçirilməsi üçün rüsum 10 manatdan 20 manata qaldırılacaq.
 
Bununla yanaşı, sürücülük vəsiqəsinin verilməsi və ya sürücülük vəsiqəsinin dəyişdirilməsi üçün bəzi rüsumların artırılması da təklif olunur. Belə ki, sürücülük vəsiqəsinin verilməsinə görə rüsumun avto-moto nəqliyyat vasitələri üçün 15 manatdan 18 manata qədər artırılması təklif olunur. Qanuna edilən yeni əlavəyə görə, traktor, tikintidə, meşə və kənd təsərrüfatında, başqa işlərdə istifadə üçün nəzərdə tutulan özügedən maşınlar, texnoloji, yarış məqsədli idman və digər mexaniki nəqliyyat vasitələri, onların qoşqu və yarımqoşqularının idarə edilməsi üçün sürücülük vəsiqəsinin verilməsi və dəyişdirilməsinə görə rüsum 5 manat müəyyən edilib.
 
Müzakirələrdən sonra layihə Milli Məclisin plenar iclasına tövsiyə olunub.