SOCAR-ın HR direktoru: "Eşidirəm ki, SOCAR-da işə düzəltmək adı ilə filankəs filankəsdən filan qədər pul alıb"

Məlumat verdiyimiz kimi, SOCAR-ın İnsan Resursları Departamentinin rəhbəri Asif Bəkirlinin Avropa.info-ya geniş müsahibə verib. Müsahibədən maraqlı məqamları oxucuların diqqətinə çatdırırıq.

Asif müəllim SOCAR-ın işə qəbul sistemi ilə bağlı narazılıqların olması ilə bağlı suala belə cavab verib: "Biz bununla bağlı dəfələrlə açıqlamalar verərək cəmiyyətə mesajlar ünvanlamışıq ki, bu prosesdə təkcə bizim departament yox, bütün cəmiyyət iştirak etməlidir. Onu da deyim ki, işə qəbul zamanı biz vətəndaş cəmiyyətinin nümayəndələri ilə sıx əməkdaşlıq edirik və işə qəbul zamanı şəffaflığın, obyektivliyin təmin olunması məqsədi ilə onların da nümayənədlərini dəvət edirik. Yəni biz tərəfdən nə lazımdırsa, maksimum onu edirik. Ona görə də Departamentdə neqativ yolla işə qəbul olunması fakta söykənə bilməz."

Asif müəllim həmçinin işə qəbul zamanı rüşvət alınması məsələ ilə bağlı yayılan şayiələrə də öz mövqeyini bildirib: "Bizim departamentdə işə qəbul zamanı nəinki rüşvətdən, hətta kiçik bir “hörmət”dən belə söhbət gedə bilməz. İnsan Resursları Departamentində işə qəbul prosesində hər hansı kənar təsir və ya müdaxilədən də söhbət gedə bilməz. Burada əsas meyar insanın vakansiyanın tələbinə uyğun olan səriştəsidir. Amma onu da məlumdur ki, cəmiyyətdə insanların toruna düşdükləri “fırıldaqçılar” var və onlar bu işlə məşğul olurlar. Bunun da qarşısını biz təkbaşına ala bilmərik. Onu da eşidirəm ki, SOCAR-da işə düzəltmək adı ilə filankəs filankəsdən filan qədər pul alıb. Belə faktlarla bağlı məhkəmədə xeyli iş var və onlara baxılır. Hətta bir neçəsi artıq bitib. Bunlarla bağlı SOCAR olaraq dəfələrlə insanlara müraciət etmişik ki, belə fırıldaqçılara inanmayaraq, şübhə olanda prosesin hüquq-mühafizə orqanları tərəfindən araşdırılmasına çalışmaq lazımdır. İşə qəbulda narazıçılığa gəldikdə bunu təbii qəbul edirik. Çünki SOCAR-a işə qəbul olmaq istəyən insanlar qat-qat çoxdur."

SOCAR-ın İnsan Resursları Departamentinin rəhbəri departmentə daxil olan şikayətlər haqqında da məlumat verib: "Əsasən işə qəbul zamanı anlaşılamzılqlarla bağlı şikayətlər daxil olur. Bəzən bizi qərəzçilikdə ittiham edirlər. Bu zaman şikayətlər Apellyasiya komissiyası tərəfindən onların iştirakı ilə araşdırılır və videoyazılar ortaya qoyulur və proses obyektiv araşdırılır. O zaman kimin haqlı-haqsız olduğu ortaya çıxır. Fürsətdən istifadə edərək vətəndaşlarımıza tövsiyyə edərdim ki, neqativ halla bağlı iradlarını mənə sosial şəbəkələr vasitəsi ilə deyil, müsabiqə prosesi zamanı və yaxud da nəticəni aldıqda yalnız [email protected] ünvanına göndərməklə bildirsinlər, ancaq real faktlara əsaslanmaqla."

--------------------------------------------------------------------------------------------------------------------------------