Xəbər verdiyimiz kimi, Əmək Məcəlləsinə təklif edilən dəyişikliyə əsasən, altı ay müddətinədək bağlanılmış əmək müqaviləsində ən çoxu iki həftə, digər əmək müqavilələrində isə ən çoxu 3 ay sınaq müddəti təyin ediləcək. Qeyd edək ki, hal-hazırki qanunvericiliyinə əsasən, sınaq müddəti müəyyən edilməyən hallar istisna olmaqla, əmək müqaviləsi işçinin peşəkarlıq səviyyəsini, müvafiq əmək funksiyasını icra etmək bacarığını yoxlamaq məqsədi ilə sınaq müddəti maksimum 3 ay müəyyən edilməklə bağlanıla bilər.

Mks.az saytının ekspertlərinin fikrincə təklif edilən yeni dəyişiklikdə məqsəd qisa müddətli (6 ayadək) bağlanan əmək müqavilələrinin sayını azaltdırlmasına xidmət etməsidir. Hal-hazırda qüvvədə olan qanunvericiliyə əsasən, müddəti 2 aya qədər olan əmək müqavilələrində sınaq müddəti müəyyən edilə bilməz. Əmək Məcəlləsinə dəyişiklik təsdiq edildikdən sonra, müddəti 2 aydan 6 aya qədər olan əmək müqavilələrində  sınaq müddətinin maksimum 3 ay yox 2 həftə müəyyən edilməsinə icazə veriləcək. 

Bir məsələni də qeyd edək ki, əmək müqaviləsinin müddətinin 6 aya qədər olması halında sınaq müddətinin 2 həftə olması tələbi Rusiyanın Əmək Məcəlləsində də öz əksini tapıb. Rusiyanının Əmək Məcəlləsinin 70-ci maddəsinə əsasən, 2 aydan 6 ayadək bağlanan əmək müqavilələrində sınaq müddəti iki həftədən çox ola bilməz ( При заключении трудового договора на срок от двух до шести месяцев испытание не может превышать двух недель).