Turniket iş yerində tabel uçotunu əvəz edə bilər?

Satışı davam edən "A-dan Z-yə: Kargüzarlıq" (V nəşr) kitabından seçmə

Bölmənin əvvəlində də qeyd etdiyimiz kimi əməyin təşkilinin qaydasından asılı olaraq müəssisələrdə tabel uçotunun aparılması forması da dəyişir. Xüsusilə, böyük təşkilatlarda rəhbərlik bir çox vasitələrdən istifadə edir ki, işçilər işə gecikməsin, işdə olduğu müddətdə vaxtlarını əhəmiyyətsiz işlərə sərf eləməsinlər. Belə təşkilatlarda “vaxt itkilərinin” sayını sıfıra endirmək üçün bahalı avadanlıq və proqramlar alınır, iş vaxtının uçotu avtomatlaşdırılır. Bu, müəssisənin girişində quraşdırılan turniketlər və ofisin müxtəlif hissələrində yerləşdirilən kameralardır ki, işçilərə işə gecikməyə və digər şöbələrdəki əməkdaşlarla uzun müddətli söhbətlərə vaxt sərf etməyə imkan vermir.
Turniket iş yerində təkcə təhlükəsizliyin təmin edilməsi üçün bir vasitə deyil, o həm də iş vaxtının uçotunu aparan “tabelçidir”. Açar-kartda olan mikroçipdəki informasiyalar əvvəlcə təhlükəsizlik xdimətinin kompüterində toplanır. Sonra isə həmin məlumatlar faktiki işlənmiş iş vaxtları əsasında əmək haqqının hesablanması üçün mühasibatlığa təqdim edilir. Ancaq iş vaxtının uçotu məqsədilə turniketdən istifadə mühasibi müvafiq tabelin aparılmasından azad etmir. İşçilərin işə gəlişi və gedişi ilə bağlı məlumatlar, əmək qabiliyyətinin müvəqqəti itirilməsi, məzuniyyətlər və sair barədə informasiyalar tabelə daxil edilir. İş vaxtının uçotunun avtomatlaşdırılması müəssisədə sənəd dövriyyəsinin elektronlaşdırılmasından birbaşa asılıdır. Böyük təşkilatlarda avtomatlaşdırma yeganə çıxış yolu kimi görünür. Ancaq kiçik təşkilatlarda bu iş köhnə qayda ilə, əllə aparılır və onların müvafiq avadanlıq və proqramların quraşdırılmasına sərf edəcək böyük maliyyələri yoxdur. Ölkəmizdə kadrlarla iş üzrə mütəxəssislərin və mühasiblərin əksəriyyəti tabel uçotunun kağız üzərində aparılmasına üstünlük verir və bunu daha etibarlı üsul hesab edirlər. Belə görünür ki, yaxın onillikdə bu üstünlük öz mövqeyini qoruyacaq.