İşəgötürən hansı halda əmək müqaviləsini razılıqsız ləğv edə bilməz?

Satışı davam edən “Əməyin uçotu: A-dan Z-yə” kitabından seçmə

Əmək Məcəlləsinin 80-ci, “Əmək müqaviləsinin işəgötürən tərəfindən ləğvi zamanı razılaşmalar”  maddəsinin birinci hissəsinə əsasən, bu Məcəllənin 70-ci maddəsinin “b” və “ç” bəndlərində göstərilən əsaslarla işəgötürən tərəfindən həmkarlar ittifaqının üzvü olan işçinin əmək müqaviləsi müəssisədə fəaliyyət göstərən həmkarlar ittifaqı təşkilatının qabaqcadan razılığı alınmaqla ləğv edilir.

Maddədə diqqət yetirilməli birinci məqam odur ki, işəgötürənin razılıq alması üçün mütləq həmin müəssisədə işçilərin həmkarlar ittifaqı olmalıdır. Digər məqam isə həmkarlardan razılığın əmək müqaviləsinə uyğun olaraq aşağıdakı xitam hallarında alınması ilə bağlıdır:

- işçilərin sayı və ya ştatları ixtisar edildikdə (Əmək Məcəlləsinin 70-ci maddəsinin “b” bəndi);

- işçi özünün əmək funksiyasını və ya əmək müqaviləsi üzrə öhdəliklərini yerinə yetirmədikdə, yaxud bu Məcəllənin 72-ci maddəsində sadalanan hallarda əmək vəzifələrini kobud şəkildə pozduqda (Əmək Məcəlləsini 70-ci maddəsinin “ç” bəndi.

Mİsal 1. Həmkarlar ittifaqı olmayan işəgötürən maliyyə göstəricilərinin zəifləməsi səbəbindən satış meneceri vəzifəsində çalışan işçilərin ixtisarına qərar verib. Bu halda işəgötürənin hər hansı razılıq alması nəzərdə tutulmayıb, çünki müəssisədə işçilərin həmkarlar ittifaqı yoxdur.

Mİsal 2. Neft-qaz sektorunda çalışan işəgötürən əmək funksiyasını yerinə yetirməyən işçinin əmək müqaviləsinə Məcəllənin 70-ci maddəsinin “ç” bəndi iləxitam vermək istəyir. Həmin işçi həmkarlar ittifaqının üzvü olmadığı halda işəgötürənin həmin qurumdan razılıq almasına ehtiyac yoxdur.

Mİsal 3.  İşəgötürən bütün əməliyyatlar üzrə nağdsız hesablaşmalara keçməsi səbəbindən kassir ştatını ixtisar etməyi planlaşdırır. Kassir vəzifəsində çalışan işçilər həmkarlar ittifaqının üzvü olduqları üçün işəgötürən işçilərin ixtisarı prosesini həmkarlar ittifaqının razılığı ilə həyata keçirməlidir.

Hal-hazırda satışı davam edən NƏŞRLƏRİMİZ