Məzuniyyətin verilməsi necə rəsmiləşdirilir?

"Əmək Qanunvericiliyi və Şərhlər Toplusu" 2020 kitabının "Məzuniyyətlər" bölməsindən seçmə

Əmək qanunvericiliyinin tələblərinə əsasən, məzuniyyətin rəsmiləşdirilməsi üçün xüsusi tələblər gözlənilməlidir. Əmək Məcəlləsinin 138-ci maddəsinə əsasən, məzuniyyətin rəsmiləşdirməsi prosesi aşağıdakı kimi həyata keçirilir:
- İşçi məzuniyyətə çıxması haqqında ərizə yazır;

Ərizədə işçinin hansı məzuniyyət növündən istifadə etməsi və məzuniyyət dövrü haqqında məlumatlar qeyd edilir;
- İşəgötürən işçinin ərizəsi əsasında əmr (sərəncam, qərar) verir;
Əmrdə (sərəncamda, qərarda) işçinin adı, atasının adı və soyadı, vəzifəsi (peşəsi), verilən məzuniyyətin növü, müddəti, müvafiq iş ili, məzuniyyətin başlandığı, qurtardığı və məzuniyyət müddəti bitdikdən sonra işçinin işə başlamalı olduğu il, ay, gün göstərilir.
İşəgötürənin məzuniyyətin verilməsi barədə əmri (sərəncamı, qərarı) məzuniyyətin başlamasına azı beş gün qalmış verilməli və işçi onunla tanış edilməlidir. Qeyd olunan müddət məsələsi təcrübədə ən çox mübahisə yaradan məsələlərdən biridir. Məzuniyyətin növbəliyi prosesində müddətə müəyyən mənada əməl etmək mümkün olsa, digər hallarda onun tənzimlənməsi çətinlik yaradır. Misal üçün, müharibə veteranı olan işçi ərizə ilə müraciət edir ki, 3 gündən sonra əmək məzuniyyəti hüququndan istifadə etmək istəyir. Bu cür hallarda təbii ki, işəgötürənin 5 gün müddəti gözləməsi mümkün deyil.