Kommersiya təşkilatları könüllük müqaviləsi üzrə ödənişsiz olaraq şəxsi cəlb edə bilər?

25 sentyabr 2019-cu il tarixdən satışda olacaq "Əmək münasibətləri: A-dan Z-yə" kitabından seçmə

Könüllü fəaliyyət əvəzi ödənilməyən fəaliyyətdir. Könüllü fəaliyyəti ancaq dövlət orqanları, dövlət büdcəsindən maliyyələşən təşkilatlar, yerli özünüidarə orqanları və qeyri-hökumət təşkilatları həyata keçirə bilərlər, kommersiya qurumları könüllü fəaliyyətlə məşğul ola bilməzlər.

Bundan əlavə, könüllü fəaliyyətdə ictimai faydalı bir xidmətlərinin və işlərinin görülməsi olmalıdır. Burada sual meydana çıxır ki, könüllü fəaliyyət hansı istiqamətlərdə aparılmalıdır, istənilən bir xidmət, iş ictimai faydalı sayıla bilərmi?

Aşağıdakılar könüllü fəaliyyət istiqamətləri sayılır:

- əlillərə, kimsəsizlərə, qocalara, aztəminatlı ailələrə, qaçqınlara və məcburi köçkünlərə kömək edilməsi;

- insanpərvərliyin və dözümlülüyün təbliği;

- istehlakçıların hüquqlarının qorunması;

- hüquqi və mədəni maarifləndirmə;

- uşaq və gənclərin təhsili, tərbiyəsi, fiziki və əqli inkişafı;

- idmanın inkişafı;

- xəstəliklər və epidemiyalar barədə məlumatlandırma;

- sağlam həyat tərzinin təbliği;

- ətraf mühitin mühafizəsi;

- tarix və mədəniyyət abidələrinin, mədəni və mənəvi irsin qorunması;

- silahlı münaqişələr, təbii fəlakətlər, sənaye qəzaları, yanğınlar, epidemiyalar, epizootiyalar və digər fövqəladə halların nəticələrinin aradan qaldırılmasına, o cümlədən fövqəladə hallar nəticəsində zərər çəkmiş şəxslərə yardım göstərilməsi;

-cəzaçəkmə müəssisələrindən azad edilən, narkotik asılılığa düçar olan, məişət zorakılığına məruz qalan şəxslərə və çətin həyat şəraitində olan digər şəxslərə (ailələrə) kömək edilməsi;

- Azərbaycan Respublikası qanunvericiliyinin tələblərinə zidd olmayan digər fəaliyyət sahələri.