İşçinin sosial məzuniyyət getdiyi halda, müddətli əmək müqaviləsi necə tənzimlənməlidir?

20 sentyabr 2019-cu il tarixdən satışda "Əməyin uçotu: A-dan Z-yə" kitabından seçmə

Əmək Məcəlləsinin 47-ci maddəsi müddətli əmək müqaviləsi bağlanması halları müəyyən edir. Həmin halları izah etməyə çalışaq:

 a) işçinin əmək qabiliyyətini müvəqqəti itirməsi, ezamiyyətdə, məzuniyyətdə olması, habelə iş yeri və vəzifəsi saxlanılmaqla qanunvericilikdə nəzərdə tutulmuş digər hallarda müəyyən səbəbdən müvəqqəti olaraq işə çıxmaması ilə əlaqədar onun əmək funksiyasının başqa işçi tərəfindən icrasının zəruriyyəti olduqda;

Misal: Kassir vəzifəsində işləyən işçi Şahlarova Fəridə analıq məzuniyyətinə çıxdığı üçün 5 aya işə çıxa bilməyəcək. Bu zaman işəgötürən kassir vəzifəsi götürəcək işçi ilə 5 aylıq müddətinə əmək müqaviləsi imzalaya bilər.  Əgər Fəridə xanım qismən ödənişli məzuniyyətə çıxmağa qərar verərsə, bu zaman kassir vəzifəsinə götürüləcək işçi ilə əmək müqaviləsi Fəridə xanımın qayıtma tarixinə kimi uzadılmalıdır.

Bu məsələdə bir məqama xususi diqqət yetirmək istəyirik. Bildiyimiz kimi, qismən sosial məzuniyyətin maximum müddəti 3 illikdir. Misalımızın davamı olaraq bildirək ki, Fəridə xanım 3 illik müddətinə qismən sosial məzuniyyətə çıxmaq istəsə də, iki il müddətdən keçdikdən sonra işə qayıtmağa qərar verir. İşçinin bu cür qərar verilməsinə hüququ çatır və hər hansı qanunvericiliyin tələbi pozulmur. Bu cür halların təcrübədə baş verilməsini nəzərə alaraq, işçini əvəz edən şəxslə bağlanan əmək müqaviləsi ilə bağlı sənədlərdə müddətini qismən sosial məzuniyyətdə olan işçinin işə qayıtma vaxtı qeyd etmək məqsədəuyğundur.