Əksər HR və Mühasiblər üçün AKTUAL SƏNƏD FORMASI

15 sentyabr 2019-cu il tarixdən satışda olacaq "Kargüzarlıq: A-dan Z-yə" kitabından seçmə

Minimum aylıq əmək haqqının artırılması ilə bağlı Azərbaycan Respublikası Prezidentinin 18 iyun 2019-cu il tarixli sərəncamı 1 sentybar 2019-cu il tarixdən qüvvəyə minir. Bu da işəgötürənlər üzərinə müəyyən rəsmiləşdirmələrin aparılması öhdəliyi qoyur. Xüsusilə, özəl sektorda 250 manatdan aşağı əmək haqqı alan işçilərin əmək haqqının minimum əmək haqqı məbləğindən aşağı olmamaq şərti ilə artırılması həm qanunvericliyin tələblərinin icrası, həm də müəssisədaxili kargüzarlığın aparılması baxımından çox vacibdir.

Minimum əmək haqqı artırıldıqdan sonra işəgötürənin həyata keçirməli olduğu prosedurları ardıcıllıqla, müvafiq sənədlərin nümunəvi formaları ilə birlikdə təqdim edirik. İlk növbədə, vəzifə maaşı minimum əmək haqqıdan aşağı olan işçilərlə əmək haqqı dəyişikliyini özündə əks etdirən əmək müqaviləsinə əlavə razılaşma imzalanmalı, dəyişiklik reyesterə daxil edilməlidir. Belə əlavə razılaşmanın nümunəvi formasını təqdim edirik:

----------------------------------------------------------------------------------------------------------------------------------------------------------------------------

10 fevral 2019-ci il tarixli, ___№-li əmək müqaviləsinə

 Əlavə razılaşma №_____

Bakı  şəhəri                                                                                                      29  avqust 2019-cu il                                                                                                     

 Bir tərəfdən “İşəgötürən”-  nizamnaməsinə əsasən fəaliyyət göstərən “Alov” MMC, Baş direktoru Nəbili Nüsrət Nadir oğlunun şəxsində, digər tərəfdən “İşçi”- Satış üzrə mütəxəssis Qarayev Sabir Cabbar oğlunun şəxsində aşağıdakı şərtlərlə 10 fevral 2019-ci il tarixli, ___№-li əmək müqaviləsinə Əlavə razılaşma imzaladılar.

 Əmək müqaviləsinin 4.1-ci bəndi aşağıdakı redaksiyada verilsin: “1. İşçiyə hər ay 320 (üz yüz iyirmi) manat məbləğdə əmək haqqı ödənilir;”

1. 10 fevral 2019-ci il tarixli, ___№-li əmək müqaviləsinin (əgər əmək müqaviləsi bağlandıqdan sonra ona dəyişiklik edilməsi məqsədilə əlavə və ya əlavələr imzalanıbsa, o halda mötərizədə “Əlavənin” və “Əlavələrin” yazmaq lazımdır) digər şərtləri öz qüvvəsində qalır.
2. 10 fevral 2019-ci il tarixli, ___№-li əmək müqaviləsinə Əlavə razılaşma ilə edilmiş dəyişiklik 1 sentyabr 2019-cu il tarixindən qüvvəyə minir.
3. Əlavə razılaşma 10 fevral 2019-ci il tarixli, ___№-li əmək müqaviləsinin ayrılmaz hissəsidir və eyni hüquqi qüvvəyə malik olmaqla, 2 (iki) nüsxədə tərtib olunub. Əlavə razılaşmanın bir nüsxəsi işəgötürəndə - işçinin şəxsi işində, digər nüsxəsi isə işçidə saxlanılır.

 TƏRƏFLƏRİN İMZALARI:

İŞƏGÖTÜRƏN:                                                                                 İŞÇİ:

Baş direktor _______ Nəbili N.N.                                                    ________Qarayev S.C.

 M.Y. 

Əmək müqaviləsinə Əlavə razılaşmanın bir nüsxəsini aldım:     ________Qarayev S.C.

 ----------------------------------------------------------------------------------------------------------------------------------------------------------------------------

 Əlavə razılaşma imzalandıqdan sonra müəssisədaxili kargüzarlığın aparılması məqsədilə istifadə olunan ştat cədvəlinə dəyişikliklə bağlı əmr verilməlidir. Hesab edək ki, Azərbaycan Respublikası Prezidentinin sərəncamı ilə minimum aylıq əmək haqqı 250 manata qaldırıldıqdan sonra müəssisədə bir yox, bir neçə işçinin əmək haqqında dəyişiklik tələb olunur. Onların hər biri ilə yuxarıdakı qaydada əmək müqaviləsinə əlavə razılaşma imzalandıqdan və reysestrə daxil edilməklə yanaşı, ştat cədvəlinə dəyişiklik edilməsi ilə bağlı aşağdakı formada müvafiq əmr imzalanır.

----------------------------------------------------------------------------------------------------------------------------------------------------------------------------

                                                              Blank “Alov” MMC     

ƏMR              №________

 Bakı şəhəri                                                                   ____ ___________________2019-cu il

 Ştat cədvəlinə dəyişiklik edilməsi haqqında

Minimum aylıq əmək haqqının artırılması ilə bağlı Azərbaycan Respublikası Prezidentinin 18 iyun 2019-cu il tarixli sərəncamının tələblərinin nəzərə alınması məqsədi ilə

ƏMR EDİRƏM:

1. Cəmiyyətin direktorunun ____ ______ 2019-cu il tarixli, ____№-li əmri ilə təsdiq olunmuş 1 yanvar-31 dekabr 2019-cu iş ili üçün ştat cədvəlində aşağıdakı vəzifələr üzrə aylıq əmək haqqı 1 sentyabr 2019-cu il tarixdən qüvvədə olan minimum əmək haqqı məbləğinə müvafiq olaraq təyin edilsin:

• Xadimə - 250 (iki yüz əlli) manat.
• Ofis meneceri - 294 (iki yüz doxsan dörd) manat.
• Satış mütəxəssisi – 320 (üz yüz iyirmi) manat.

2. Əmrin icrasına nəzarət Kadrlarla iş şəbəsinin müdiri Ağazadə Nazlı Həsənağa qızına həvalə olunsun.

 Direktor _______ Nəbili N.N.

Tarix: ________

 ----------------------------------------------------------------------------------------------------------------------------------------------------------------------------

Növbəti mərhələ əmək haqqının artırılması ilə bağlı hər bir işçi ilə bağlı ayrıca əmrin verilməsidir. Belə əmrin nümunəvi forması isə aşağıdakı kimidir:

                                                               Blank “Alov” MMC     

ƏMR №________

 Bakı şəhəri                                                                   ____ ___________________2019-cu il

 İşçinin vəzifə maaşının artırılması barədə

 Minimum aylıq əmək haqqının artırılması haqqında Azərbaycan Respublikası Prezidentinin 18 iyun 2019-cu il tarixli sərəncamının tələblərinə uyğun olaraq Satış şöbəsinin satış üzrə mütəxəssisi Qarayev Sabir Cabbar oğlu ilə bağlanılmış 10 fevral 2019-ci il tarixli, ___№-li əmək müqaviləsinə Əlavə razılaşmaya əsaslanaraq

 ƏMR EDİRƏM:

 1.Satış şöbəsinin satış üzrə mütəxəssisi Qarayev Sabir Cabbar oğlunun vəzifə maaşı 1 sentyabr 2019- cu il tarixdən 320 (üz yüz iyirmi) manat təyin edilsin.

2. Baş mühasib Səlimova Sultanə Sahib qızı işçinin əmək haqqından hesablamaları 1 sentybar 2019-cu il tarixdən edilmiş dəyişikliyə uyğun həyata keçirsin.
3. Əmrin icrasına nəzarət Kadrlarla iş şöbəsinin müdiri Ağazadə Nazlı Həsənağa qızına tapşırılsın.

 Direktor _______ Nəbili N.N.

Əmrlə tanış oldum:

__________ Səlimova S.S.

Tarix: ________

 __________ Qarayev S.C.

Tarix: ________

 ----------------------------------------------------------------------------------------------------------------------------------------------------------------------------