Müvəqqəti əvəzetməyə görə əmək haqqı necə hesablanır və icbari ödənişlərə necə cəlb olunur?

"Vergi uçotu: A-dan Z-yə" kitabından seçmə

Bu bölmə üçün maraqlı olan məsələlərdən biri də işçinin öz əmək funksiyasını yerinə yetirməklə yanaşı, müəyyən səbəbdən müvəqqəti işə çıxmayan işçini əvəz eməsidir. Bu məsələlər əmək Məcəlləsinin “Müvəqqəti əvəzetməyə görə haqqın ödənilməsi” maddəsilə tənzimlənir. Maddənin tələbinə görə, analoji halda işçiyə verilən məbləğ iki variantda hesablanır: İşçiyə, əvəz edilən işçinin tarif (vəzifə) maaşı ilə onun maaşı arasındakı fərq ödənilir. əvəz edilən işçinin tarif (vəzifə) maaşı əvəz edən işçinin maaşı ilə eyni və ya ondan az olduqda isə əmək haqqına əlavə müəyyən edilib verilir. Bu əlavə işçinin və işəgötürənin qarşılıqlı razılığı ilə müəyyən edilir.

Misal. Tutaq ki, mühasib vəzifəsində çalışan Məmmədov Tural 500 manat əmək haqqı alır. Fərz edək ki, 20 iş günü olan aprel ayında işçi öz əmək funksiyası ilə yanaşı, işə çıxmayan və 800 manat əmək haqqı alan baş mühasibi 2 iş günü əvəz edib. Bu zaman, Turalın aprel ayında olan əmək haqqı belə hesablanacaq: 500 manat (öz əmək haqqı) + (800 -500) x 2 gün (əvəz etdiyi günlərin sayı) / 20 (ay ərzində iş günlərinin sayı) = 530 manat. Misaldan da göründüyü kimi işçi əvəzetməyə görə hesablanan məbləğ öz əmək haqqının üzərinə əlavə olunur və ondan ümumi qaydada gəlir vergisi, sosial ayırma və işsizlikdən sığorta hesablanır.