Əmək haqqıdan gəlir vergisi ilə bağlı ziddiyyət, yoxsa...

Sual: Hörmətli ekspert, ilk olaraq cavabınız üçün təşəkkür edirəm. Əslində mənə qaranlıq qalan məsələ maddə 102.5 də göstərilən uşağın doğulduğu ... aydan azaldılır cümləsidir. Bunu mən belə anlayıram ki, bəli, işçinin hüququ maddə 102.8-də deyildiyi kimi sənədlərin təqdim edildiyi andan yaranır, amma hesablama təqdim olunan sənədlərdə göstərilən doğum tarixilə hesanlanır. Belə deyilsə, onda 102.5-dəki o cümlə nəyi nəzərdə tutur? Bu bir növ Əmək Məcəlləsində yeni işçinin məzuniyyətdən istifadə hüququ 6 aydan sonra yaranır, göstərilsə də, onun məziniyyət günləri əslində işə alındığı tarixdən etibarən hesablanır misalına bənzəyir. Ümid edirəm ki, fikrimi izah edə bildim. Xahiş edirəm buna aydınlıq gətirəsiniz. Təşəkkürlər!
Zaur Qədirli

Cavab: Maraqlı sualdır, eyni zamanda sualda maraqlı açıqlama vermisiniz. Bütün hallarda fikirləşirəm ki, bir daha müvafiq maddələri nəzərdən keçirməyə ehtiyac var.
102.5. ......................
Fiziki şəxslərin vergi tutulan gəliri uşağın doğulduğu və himayədə olanın himayəyə götürüldüyü aydan başlayaraq azaldılır.
102.8. Əmək haqqından tutulan vergi hesablanarkən fiziki şəxslərin bu maddədə sadalanan vergi güzəştləri hüququ müvafiq icra hakimiyyəti orqanı tərəfindən müəyyənləşdirilmiş sənədlərin təqdim edildiyi andan yaranır və yalnız fiziki şəxsin əsas iş yerində (əmək kitabçasının olduğu yerdə) həyata keçirilir.
102.5-də görünür ki, güzəşt uşağın anadan olduğu aydan tədbiq olunmalıdır. Təbii ki, uşaq ayın əvvəlində, ortasında və ya sonunda anadan ola bilər. Bütün hallarda deyilir ki, anadan olan ayın əvvəlindən güzət verilməldir.
Amma 102.8-də yazılır ki, lazımı sənədlərin əsas iş yerinə təqdim olunduğu andan güzəşt verilə bilər. Bu müddəa ilk baxışdan iki maddə arasında ziddiyyət kimi görünür, amma mən belə düşünmürəm. Əksinə iki maddə bir-birini tamamlayır. Yəni, 102.5-də deyir ki, uşağın ayın neçəsində anadan olmasına baxmayaraq, ayın əvvəlindən güzəşt veriləcək. 102.8-də isə yazılır ki, işçi çalışsın sənədlərini həmin ayda təqdim etsin və ayın əvvəlindən güzəşti əldə etsin, gecikdirsə, onda hansı ayda təqdim etsə, həmin aydan da güzəşt alacaq. Fikrinizə hörmətlə yanaşıram, amma mənin fikrim belədir.

Satışda olan nəşrlərimiz:  

1) Əmək Münasibətləri: A-dan Z-yə