Mühasib bilmədən rəhbərin mənimsəmə faktının iştirakçısı olsa və faktı özü etiraf etsə cinayət məsuliyyətinə cəlb olunur? (VİDEO)

Tanınmış audit mütəxəssisi Mehdi Babayevlə böyük prokuror Elnur Musayev arasında maraqlı mükalimə

 Milli Mühasiblər Forumunun sessiyasında audit üzrə mütəxəssis Mehdi Babayev Azərbaycan Respublikasının Baş prokuroru yanında Korrupsiyaya qarşı Mübarizə İdarəsinin böyük prokuroru Elnur Musayevə maraqlı və praktiki sual verib: “Tutaq ki, müəssisəsinin rəhbəri təşkilatın baş mühasibinə tapşırır ki, hər hansı təşkilata anbardan müəyyən miqdarda mal göndərilməsi üçün qaimə-faktura hazırlasın. Təbii ki, hazırlanan qaimə-fakturaya baş mühasib də imza atır. Bir müddətdən sonra korrupsiya idarəsindən gəlirlər ki, mühasibin imza atdığı qaimə-fakturaya əsasən anbardan çıxarılan mallar oğurluq məqsədilə aparılıb. Digər bir misal, tutaq ki, rəhbər tapşırır ki, X təşkilatına ödəniş olunmalıdır. Mühasib də ona təqdim olunan müqavilə sənədlərinə əsasən hazırlanan ödəniş tapşırığını imzalayaraq ödənişi həyata keçirir. Yenə sonradan məlum olur ki, bu ödəniş vəsaitin nağlaşdırılması məqsədilə həyata keçirilib. Sual ondan ibarətdir ki, bu cür hallarda mühasibin hər hansı məsuliyyəti varmı, varsa, mühasib hansı hərəkətləri etməlidir ki, məsuliyyətdən azad olsun?”

Elnur Musayev bidirib ki, koorupsiya üzrə milli qanunvericilik hazırlanarkən beynəlxalq qanunvericiliyin tələbləri əsas götürülüb: “Sizin qeyd etdiyiniz kimi, mühasib müdiriyyətin onu əmin etdiyi və normal sənədlər kimi təqdim etdiyi sənədləri imzalayır. Bilirik ki, mühasiblər təlimləndirilir və hər bir şəxs mühasib ola bilməz. Forumun açılışı zamanı türk professorun da bildirdiyi kimi, hər əlinə qələm alan mühasib ola bilməz, həmçinin mühasib də müdiriyyətin hər sözünə inanmamalıdır. Mühasiblə müdir arasında şəxsi münasibətlər yox, işgüzar münasibətlər olmalıdır. Prokorurluğun nümayəndəsi kimi bildirirəm ki, əlbəttə mühasib məsuliyyət daşıyır. Mühasib ali təhsil alan, vəzifə təlimatı ilə tanış olan və müəssisənin real vəziyyətin əks etdirən şəxsdir. Əgər əks etdirə bilmirsə, deməli öz vəzifəsinin öhdəsindən gələ bilmir. Mühasib dərk etməlidir ki, onun atdığı imzaya görə əməliyyat real vəziyyəti əks etdiriməlidir. Mühasib yoxlamadan imza atırsa, bu zaman bu hal səhlənkarlıq yox, birbaşa iştirakçılıqdır.”
Mehdi Babayevin “Əgər mühasib sonradan əməliyyatın qeyri-qanuni olduğunu bilib, dövlət orqanına məlumat verirsə, o zaman məsuliyyəti nə olacaq” sualına böyük prokurorun cavabı belə olub: “Qanunvericilikdə maliyyə cinayətlərində öncədən məlumat verməklə məsuliyyətdən azad olma ancaq rüşvət cinayətlərinə şamil olunur. Rüşvət verməsi haqqında müəyyən şərtlərlə məlumat verərsə, o zaman məsuliyyətdən azad oluna bilər. Mühasib peşəsi ilə əlaqədar olan vəzifə səlahiyyətindən sui-istifadə, mənimsəmə və digər cinayət əməlləri üçün öncədən məlumat vermək cinayət məsuliyyətindən azad etmir. Ancaq bunu yüngülləşdirici hal kimi nəzərə almaq olar.”

Sualın cavabın video variantına baxmaq üçün link 

https://www.youtube.com/watch?v=OrtgqpIoblc&feature=share