Lizinq müqaviləsində faiz dərəcəsi qəsdən aşağı göstərildikdə və ya göstərilmədikdə proses necə tənzimlənir?

Hal-hazırda satışda olan "Vergi uçotu: A-dan Z-yə" (II nəşr) kitabının "Maliyyə lizinqi" bölməsindən seçmə

Təcrübədə rast gəlinən hallardan biri odur ki, lizinq alan və lizinq verən arasında bağlanan lizinq müqavilələrində faiz göstərilmir və ya razılaşma əsasında daha aşağı göstərilir.

Vergi Məcəlləsinin 140.4-cü maddəsinə əsasən, maliyyə lizinqi müqaviləsində ssuda ödəmələri üzrə faiz dərəcəsi göstərilmədikdə və ya maliyyə lizinqi həyata keçirən qeyri-rezidentlərə, habelə qarşılıqlı surətdə asılı şəxslərə maliyyə lizinqi üzrə icarə ödəmələrinin cari dəyərini müəyyənləşdirməkdən ötrü istifadə edilən faiz dərəcəsi ödəmələri aid olduğu dövrdə eyni valyuta ilə, oxşar müddətə verilmiş banklararası kredit hərracında olan və ya hərraclar keçirilmədiyi təqdirdə banklararası kreditlər üzrə faizlərin orta səviyyəsinin 125 faizi məbləğində götürülür.
Maddədən göründüyü kimi, vergi orqanları əsas vəsaitəri lizinq müqaviləsi adı altında pərdələməklə prosesi həyata keçirənlər üçün oxşar müddətə verilmiş banklararası kredit hərracında olan və ya hərraclar keçirilmədiyi təqdirdə banklararası kreditlər üzrə faizlərin orta səviyyəsinin 125 faizini tətbiq etməklə, mənfəət (gəlir) vergisinə cəlb edilən gəlirlərin müəyyən olunmasını təmin edir.