Xarici ezamiyyə zamanı ezamiyyə haqqının hesablanmasının misalla izahı

"Vergi uçotu: A-dan Z-yə" kitabından seçmə

Respublika daxili ezamiyyə normaları haqqında kifayət qədər məlumat verməyə çalışdıq, indi isə xarici ölkələrə ezamiyyə xərclərinin 1 günlük normaları haqqında məlumat verək.

Azərbaycan Respublikası Nazirlər Kabinetinin 25 yanvar 2008-ci il tarixli, 14 nömrəli qərarı ilə xarici ölkələrə ezamiyyə xərclərinin 1 günlük normaları müəyyən olunub. Qeyd edək ki, kitabın üzərindəki CD diskdə xarici ölkələrə ezamiyyə xərclərinin 1 günlük normalarının ölkələr üzrə məbləğləri yerləşdirilib. İndi isə misallarla xarici ölkələr üzrə ezamiyyənin hesablanmasına aydınlıq gətirək. “A” MMC-nin qərarına əsasən, işçi Türkiyənin İstanbul şəhərində keçirilən sərgidə iştirak etmək üçün 5 günlük ezamiyyətə göndərilib. Nazirlər Kabinetinin təsdiq etdiyi ezamiyyə normalarına əsasən, Türkiyə üçün gündəlik ezamiyyə norması 150 avro olsa da, Ankara və İstanbul şəhərləri üçün 165 avro müəyyən edilib. Bu, necə başa düşülməlidir? Əgər işçinin ezam olunduğu şəhər İzmir (və ya Bursa, Antalya, Əskişəhər vΩ sair) olsaydı, bu zaman gündəlik ezamiyyə norması 150 avrodan hesablanacaqdı. Misalımızda işçinin ezam edildiyi şəhər İstanbul olduğu üçün gündəlik hesablanan məbləğ 165 avro təşkil edir. Respublika daxili ezamiyyə normalarında gündəlik xərc ezamiyə normasının 20 faizi qədər hesablansa da, xarici səfərlər zamanı ezamiyyə xərclərinin 1 günlük normasının 40 faizini gündəlik yemək xərcləri təşkil edir. Həmçinin, xarici ezamiyyə zamanı mehmanxana xərcləri üçün təsdiqedici sənədlər tələb olunmur. İndi işçiyə ezamiyyə xərclərinin hesablanmasını həyata keçirək:

İşçi 6 may 2019-cu il tarixdə Türkiyənin İstanbul şəhərinə ezamiyyəyə gedir və 10 may 2019-cu il tarixdə geri qayıdır. Bu zaman 4 günlük mehmanxana xərci və 5 günlük gündəlik xərc ödəniləcək. İşçiyə ödəniləcək 4 günlük mehmanxan xərci 396 (165 avro x 60 faiz x 4 gün) avro təşkil edir. Gündəlik xərc  isə 330 (165 avro x 40 faiz x 5 gün) təşkil etdiyindən işçiyə 726 (396+330) avro ezamiyyə haqqı ödəniləcək. Misalımıza uyğun olaraq bildirmək istəyirik ki, işçiyə Türkiyə səfəri üçün gediş-gəliş xərci, həmçinin hava limanına getmək üçün nəqliyyat xərci (taksi istisna olmaqla) təsdiqedici sənədlər əsasında ödənilməlidir. Xarici ezamiyyə ilə bağlı ezamiyyə normaları üzrə ödənilən məbləğin gəlirdən çıxılmasına icazə verilir.