Nağsız hesablaşmaların mahiyyəti ilə bağlı vacib 3 MƏQAM

"Vergi uçotu: A-dan Z-yə" kitabından seçmə

Maliyyə-bank sisteminin sağlamlaşdırılması tədbirlərinə dəstək vermək və nağdsız hesablaşmaları stimullaşdırmaq məqsədi ilə “Nağdsız hesablaşmalar haqqında” Azərbaycan Respublikasının 16.12.2016-cı il tarixli, 461-VQD nömrəli Qanunu qüvvəyə minib. Qanunda qeyd edilir ki, nağdsız hesablaşma dedikdə aşağıdakılar nəzərdə tutulur:

- Bir şəxsin bank hesabından digər şəxsin bank hesabına köçürülməklə (o cümlədən ödəniş alətləri (ödəniş kartları, ödəniş tapşırığı və s.) və ödəniş vasitələri (mobil telefon aparatları, kompüter və digər avadanlıq) ilə həyata keçirilən hesablaşmalar (Maddə 3.1.1)
İzahat: vergi ödəyicisi digər vergi ödəyicisinə ödəniş etmək üçün ödəniş tapşırığı vasitəsiylə 300 manat ödəniş edir. İnternet banking və mobil bankçılıq vasitəsiylə 400 manat ödəniş həyata keçirilir. Bu tip ödənişlər üzrə aparılan əməliyyatlar qeyd edilən maddəyə uyğundur.

- Ödəniş terminalları ilə həyata keçirilən hesablaşmalar (Maddə 3.1.2.)
İzahat: Vergi ödəyicisinin hesabına hazırda respublikamızda istifadə olunan “E-manat”, “Milliön”, “Easy pay” və digər ödəniş terminalları vasitəsi ilə edilən ödənişlər də nağdsız hesablaşmalar sayılır.

- Birbaşa nağd qaydada satıcının bank hesabına köçürülməklə həyata keçirilən hesablaşmalar (Maddə 3.1.3.)
İzahat: Vergi ödəyicisinin hesabına vəsait onun bank hesabı vasitəsiylə daxil olur. Misal üçün, “A” MMC-nin “Paşabank”da cari hesabı var, vətəndaş nağd vəsaitini bank şöbəsindən vergi ödəyicisinin bankdakı hesabına ödəyir.

DİQQƏT: Əgər hər iki tərəf vergi ödəyicisidirsə, o zaman nağdsız ödəniş dedikdə, nağdsız hesablaşmaların hər 3 forması deyil, yalnız birinci qaydaya uyğun, yəni bir şəxsin bank hesabından digər şəxsin bank hesabına köçürülməklə və ödəniş vasitələri ilə həyata keçirilən hesablaşmalar nəzərdə tutulur.