Əksər HR-ların əmək kitabçasının işçiyə verilməsində səhv etdiyi MƏQAM

27 sentyabr 2019-cu il tarixdən satışda olacaq "Əməyin uçotu: A-dan Z-yə" kitabından seçmə                                       

İndi isə işəgötürən tərəfindən işçiyə əmək kitabçalarının hansı formada təqdim olunması hallarını nəzərdə keçirək.

Qaydalara əsasən,  əmək kitabçasının  işdən çıxan işçiyə verilməsinin konkret müddəti müəyyən edilib. Belə ki, əmək kitabçası fərdi əmək müqaviləsi xitam oldunduğu gün (sonuncu iş günü) verilməlidir. 

Misal: “A” MMC-də çalışan Məmmədov Rahibin işdən çıxma tarixi 30 sentyabr 2019-cu il tarixi qeyd edilib. Deməli əmək kitabçası da həmin tarixdə təqdim olunmalıdır, əks halda işəgötürəni məsuliyyət daşıyır. Əmək kitabçası təqdim edilməsi mümkün olmadığı halda, işçiyə həmən gün bildiriş göndərilməsi vəya imzalatdırılmalıdır. Demək olar ki, əksər HR-larımız bu prosesi həyata keçirmirlər.

Digər hal da işçinin vəfat etməsi halıdır ki, bu zaman həmin əmək kitabçası onun ailə üzvlərinə verilir və yaxud onların tələbi ilə poçt vasitəsilə göndərilir.

Əmək kitabçası hansı hallarda poçtla göndərilməlidir?

Təcrübədə rast gəlinir ki, işəgötürən filial şəbəkəsi malik olur və işdən çıxan işçisi baş ofisə gələ bilmədiyi üçün əmək kitabçası poçtla göndərilir.  Və ya işçi əmək kitabçasının götürməkdən imtina etdiyi üçün əmək kitabçasının onun ünvanına poçtla göndərilir. Fikrimizcə, bu cür halların olması əmək kitabçaları ilə düzgün rəsmiləşdirmə sayılmır. Cünki, qaydalarda qeyd edilir ki, əmək kitabçasının poçt vasitəsilə göndərilməsinə yalnız işdən çıxan işçinin razılığı ilə yol verilir. Amma işçi əmək kitabçasının işdən  çıxan günün əldə etmirsə, o zaman ona poçt vasitəsilə bildiriş göndərilir.

Misal: Baş ofisi Bakıda olan “A” MMC-nin Mingəçevir filialının əməkdaşı Quliyev Mehman işdə çıxır. Mehmanın baş ofisə gəlmək imkanı olmadığı üçün,  əmək kitabçasının əldə edə bilmir. Bu zaman işəgötürən ona bildiriş imzalatdırır ki, əmək kitabçasını Bakı şəhərində “Caspi” Plazadan əldə edə vəya razılığı ilə poçtla göndərilə bilər. Mümkündür ki, Mehman son iş günü işdə olmasın vəya bildiriş təqdim edilməsin. Bu zaman artıq həmin bildiriş poçt vasitəsiylə işdən çıxan günü göndərilməlidir.
İşçinin razılığını təsdiq edən hər hansı sənəd olmadan əmək kitabçasının poçtla göndərilməsi qanunaziddir.