Əmək müqaviləsi imzalanması zamanı 4 VACİB MƏQAM

"Əməyin uçotu: A-dan Z-yə" kitabından seçmə

Əmək münasibətlərinin rəsmiləşdirilməsi üçün istifadə olunan əsas sənəd əmək müqaviləsi hesab olunur.  Əmək müqaviləsinin imzalanmasında iki tərəf iştirak edir: İşəgötürən və işçi.

İşçi ilə əmək müqaviləsinin imzalanması zamanı aşağıdakı tələblər gözlənilməlidir:

• Qadın əməyinin tətbiq qadağan olunan iş yerlərində xanımların işə qəbulu yolverməzdir.

Azərbaycan Respublikasının Baş nazirinin 20 oktyabr 1999-cu il tarixli və 170 saylı qərarı ilə  qadın əməyinin tətbiqi qadağan olunan, əmək şəraiti zərərli və ağır olan istehsalatların, peşələrin (vəzifələrin), habelə yerlatı işlərin siyahısı müəyyənləşib.  Həmin qərarın tam mətni kitabın üzərində olan CD-diskdə verilib. Fikrimizi daha aydın olunması üçün  bu cür siyahıya aid edilən vəzifələrin bir neçəsini qeyd edirik: Dəmirçi-presləmə və termik işlərində pres və çəkiclərlə işləyən dəmirçi, tikinti, quraşdırma və təmir-tikinti işlərində qır əridən səyyar qurğuların maşinisti və s.

• Yaşı 18-dən az olan işçilərin müəyyən vəzifələrdə çalışmasına icazə verilmir.

Azərbaycan Respublikası Nazirlər Kabinetinin  2000-ci il 24 mart tarixli, 58 nömrəli qərarı ilə  Yaşı 18-dən az olan işçilərin əməyinin tətbiqi qadağan olunan əmək şəraiti zərərli və ağır olan istehsalatların, peşələrin (vəzifələrin), habelə yeraltı işlərin siyahısı təsdiq edilib. CD-diskdə bu qərar da yerləşdiyi üçün az sayda vəzifələrin adını qeyd edirik: yüksək gərginlik elektrik mühərriklərinə xidmətlə məşğul olan elektrik mühərriki motoristi,  çaxır, spirt, likör-araq məhsullarının və pivənin saxlanması və ticarəti ilə məşğul olan işçilər və s. 

• Tibbi arayış olmadan bəzi vəzifələr üçün işçilərin işə qəbul olunması yol verilməzdir

 Azərbaycan Respublikası Nazirlər Kabinetinin 2000-ci il 3 yanvar tarixli, 1 nömrəli qərarı ilə işçinin səhhətinə, sağlamlığına mənfi təsir göstərən amillər olan ağır, zərərli və təhlükəli əmək şəraitli iş yerlərində, habelə əhalinin sağlamlığının mühafizəsi məqsədi ilə yeyinti sənayesi, ictimai iaşə, səhiyyə, ticarət və bu qəbildən olan digər iş yerlərində əmək müqaviləsi bağlanılarkən işçilərin sağlamlığı haqqında tibbi arayış tələb olunan peşələrin (vəzifələrin) iş yerlərinin siyahısı təsdiq edilib. Kitabın üzərindəki CD-diskddə qərarın tam  mətni yerləşdirilib. Qeyd edək ki, bu tip vəzifələrə bütün tədris-tərbiyə müəssisələri, Uşaq və yeniyetmələrin (mövsümi) sağlamlıq müəssisələri, məktəbəqədər təhsil müəssisələrinin işçiləri və s. aid edilir. 

• Fəaliyyət qabiliyyəti olmayan şəxslə əmək müqaviləsi imzalana bilməz

 Mülki Məcəllənin 28.8-ci maddəsinə əsasən, ağıl zəifliyi və ya ruhi xəstəlik nəticəsində öz hərəkətlərinin mənasını başa düşməyən və ya öz hərəkətlərinə rəhbərlik edə bilməyən şəxslər də məhkəmə tərəfindən fəaliyyət qabiliyyəti olmayan sayıla bilər. Qeyd edək ki, fəaliyyət qabiliyyəti olmayan sayılmış şəxsin sağaldığı və ya sağlamlıq vəziyyətinin xeyli yaxşılaşdığı halda məhkəmə onu fəaliyyət qabiliyyətli hesab edir.