İşçinin xeyrinə, amma təfsirə ehtiyacı olan dəyişiklik (14-cü yazı)

Xəbər verdiyimiz kimi, əmək münasibətlərinə məsul olan müvafiq dövlət qurumları tərəfindən Əmək Məcəlləsinin 150-dən çox maddəsinə redaktə, düzəliş və əlavə tipli dəyişikliklər barədə layihə hazırlanıb. Mks.az saytının ekspertləri dəyişikliklər haqqında silsilə yazılar hazırlayır. Bugünədək dərc olunan on üç yazıda istifadə edilməmiş məzuniyyətə görə hesablanan kompensasiya, əmək müqaviləsinin rəsmiləşdirillməsi, məzuniyyət günlərinə təsadüf edən bayram günləri, ezamiyyə, əmək müqaviləsinin müddəti, distant iş, əmək müqaviləsinə dəyişikliklərin bildirişlərə daxil edilməsi, işçinin işdən kənarlaşması, əmək müqaviləsinin işçinin təşəbbüsü, işəgötürən tərəfindən və digər hallarda ləğv edilməsi, həmçinin təhsil məzuniyyətinin hesablanması ilə bağlı təklif olunan dəyişikliklər haqqında ətraflı məlumat vermişik.

Bu yazımızda növbəli iş rejimi ilə bağlı təklif olunan dəyişikliklər haqqında məlumat verəcəyik. Dəyişikliklər paketində Əmək Məcəlləsinin "Gecə vaxtı işlərinə cəlb edilməsinə yol verilməyən işçilər" adlı 98-ci maddəsinə aşağıdakı əlavə təklif edilir:

“98-ci maddəyə aşağıdakı məzmunda 3-cü hissə əlavə edilsin:
3. Növbəli iş rejimi təşkil edilərkən və gecə növbəsinə işə təyin edilərkən, işçilərin xüsusi ehtiyacları, o cümlədən ailə öhdəliklərinin yerinə yetirilməsi ilə əlaqədar ehtiyacları, əsaslandırıldıqda və praktiki cəhətdən mümkün olduqda nəzərə alınmalıdır”.

Qeyd edək ki, qüvvədə olan Əmək Məcəlləsinə əsasən, gecə vaxtı görülən işlərə hamilə və üç yaşınadək uşağı olan qadınların, yaşı on səkkizdən az olan işçilərin cəlb edilməsinə yol verilmir. Həmçinin, əlil işçilər gecə vaxtı görülən işlərə yalnız onların yazılı razılığı ilə və müvafiq icra hakimiyyəti orqanının rəyi nəzərə alınmaqla cəlb edilə bilərlər.

Yeni əlavə işçinin xeyrinə olsa da, əlavə çox ümumidir. İşçi gecə növbəsində işlədilməmək üçün necə əsaslandıra bilər ki, onun xüsusi ehtiyacları, o cümlədən ailə öhdəliklərinin yerinə yetirilməsi ilə əlaqədar ehtiyacları var. Və ya işəgötürən qəbul etməyə də bilər ki, işçinin, tutaq ki, valideyninin evdə xəstə olması onun ailə öhdəliklərinin yerinə yetirilməsi ilə əlaqədar ehtiyacıdır.
Maraqlıdır ki, layihədə işçinin ziyanına təklif olunan dəyişikliklərdə hər şey konkret göstərilir. Misal üçün ötən yazımızda məlumat verdiyimiz kimi, təhsil məzuniyyətinin konkret 3 hal üzrə hesablanması təklif olunur. Amma işçinin xeyrinə təklif olunan dəyişikliklərdə işəgötürənin üzərinə konkret öhdəlik qoyulmur. Ümid edək ki, dəyişiklik təsdiq olunana qədər bu məsələ də konkretləşər.

"KARGÜZARLIQ A:dan Z-yə" kitabı satışda