Mehdi Babayev son dövrlərin aktual məsələsi olan dividenddən vergi öhdəliyini A-dan Z-yə izah etdi

Tanınmış audit üzrə mütəxəssis Mehdi Babayevin mks.az saytına müsahibəsi son vaxtlar dividendlərlə bağlı aparılan müzakirələrə nöqtə qoyacaq, yoxsa onu yeni müstəviyə keçirəcək? Bu sualın cavabını müsahibəni oxuyandan sonra biləcəksiniz.

 “Çaşqınlıq yaradan əsas məqam budur”

 -           Mehdi müəllim, dividend məsələsi son dövrlərin ən aktual müzakirə mövzularındandır.  Sizinlə bugünkü söhbətimizdə məqsədimiz divident məsələsinin bütün incəliklərinə aydınlıq gətirməkdir. Etiraz etmirsinizsə, elə “dividend” anlayışının izahından başlayaq.

 -           Gəlin, “dividend” anlayışının məntiqi izahından başlayaq, çünki mahiyyətin düzgün dərk edilməsi üçün buna ehtiyac var. Vergi hesablama nöqteyi-nəzərindən “dividend” anlayışının təhlilində qarışıq məqamlar mövcuddur. Ona görə də bu məfhuma vergi ödəyicisinin baxış bucağından, təsərrüfat subyektinin (mülki-hüquqi subyektin) əməliyyatı kimi yanaşmalıyıq. Məsələn, “Mənfəət vergisi ödəyicisi və ya sadələşdirilmiş vergi ödəyicisi dividend verməlidir, yoxsa verməməlidir” kimi sualların qoyuluşu məntiqsizdir. Dividendi hər hansı vergi mükəlləfiyyətinin mövcudluğundan asılı olmayarq kommersiya hüquqi şəxslər hesablaya və ödəyə bilər. Məsələyə kommersiya hüquqi şəxsin nöqteyi nəzərindən yanaşmaq lazımdır.
Vergi Məcəlləsinin 13.2.15 maddəsində “dividend” anlayışının izahı belə verilib: “dividend - hüquqi şəxsin öz təsisçilərinin (payçılarının) və yaxud səhmdarlarının xeyrinə xalis mənfəətinin (sadələşdirilmiş vergi ödəyiciləri tərəfindən vergi və xərclər çıxıldıqdan sonra gəlirin) bölüşdürülməsi ilə bağlı pul və ya digər ödəmələr şəklində etdiyi ödənişdir”. Bu o demək deyil ki, Vergi Məcəlləsi “dividend” anlayışını vergitutma məqsədli anlayış kimi qəbul edilməsini nəzərdə tutur. Yəni, açılışda verilən "xalis mənfəət" vergi məqsədli xalis mənfəət demək deyil. Çaşqınlıq yaradan əsas məqam elə budur. Təsərrüfat subyektlərinin rəhbərləri və mühasiblər birmənalı olaraq bilməlidirlər ki, dividendin verilməsi üçün əsas hesab edilən "xalis mənfəət" yalnız və yalnız müvafiq mühasibat uçotu standartının tələbləri əsasında hesablanan (yaranan) uçot xalis mənfəəti və ya yığılmış bölüşdürülməmiş mənfəət ola bilər və vergi məqsədli mənfəətlə mənfəət vergisinin fərqindən yaranan "xalis mənfəət"dən dividendin hesablanması metodikası düzgün hesab edilə bilməz. Bu o halda ola bilər ki, vergi uçotu ilə mühasibat uçotu standartları əsasında aparılan uçot arasında hər hansı fərq yaranmasın.

 “Dividend yalnız bu tələblərin hamısı yerinə yetirildikdə hesablana və verilə bilər”

 -           Kimlər dividend ödəməlidir və dividendin hər hansı dövr və ya məbləğ üzrə məcburiliyi varmı? Hansı halda dividend mütləq ödənilməlidir? Gələcəkdə hər hansı investisiya və ya başqa səbəb göstərməklə məsələn, pulu bank hesabında saxlamaqla dividend ödəməmək olarmı? Dividend vermək şəxsin vəzifəsidir, yoxsa hüququdur?

- Dividendin verilməsi üçün aşağıdakı iki vacib şərt mövcud olmalıdır:

1. Dividendi ödəyən kommersiya hüquqi şəxs olmalıdır.
2. Hüquqi şəxsin mühasibat uçotunda xalis mənfəəti yaranmalıdır.

Bundan sonra dividendin verilib-verilməməsindən və ya hesablanmasından söhbət gedə bilər.
Hazırda təşkilati hüquqi forması baxımından ən çox təşəkkül tapan kommersiya hüquqi şəxsləri Məhdud Məsuliyyətli Cəmiyyətlər (MMC) və Səhmdar Cəmiyyətləridir (ASC və QSC). Həm MMC, həm də SC üçün Mülki Məcəllədə dividendlərin verilməsi barədə müddəalar nəzərdə tutulmuşdur. Gərək mühasiblər də Mülki Məcəllənin dividendlərin hesablanması və verilməsi ilə bağlı müvafiq müddəalarını bilsinlər. Çünki, burada söhbət maliyyənin müəssisədən kənara axınından gedir. Dividendlərin verilməsi kapitalı (xalis sərvəti) azaldan iqtisadi hadisədir və müəssisənin gələcəkdə maliyyələşmə imkanlarının azalmasının müəssisənin sonrakı fəaliyyətinə təsirinin mühasib (maliyyəçi) tərəfindən qiymətləndirilməsi vacib məsələdir.
Qanunlara istinad edək. Mülki Məcəllənin 90-1-ci maddəsində (Məhdud məsuliyyətli cəmiyyətdə mənfəətin bölüşdürülməsi) MMC-lərdə, 106-3-cü maddəsində isə (Səhmdar cəmiyyətinin mənfəəti və dividendlər) SC-də dividendlərin verilməsi ilə bağlı müddəalar (tələblər) var. Hər bir rəhbər və mühasib bu tələblərin vacibliyinə diqqət yetirməlidir və bu tələbləri təmin etməyə borcludur. Dividend yalnız bu tələblərin hamısı yerinə yetirildikdə hesablana və verilə bilər. Dividendin verilməsi Mülki Məcəllənin tələbləri cərçivəsində hüquqi baxımdan düzgün müəyyən edildikdən sonra vergitutma məsələləri Vergi Məcəlləsi ilə tənzimlənir. Demək istədiyim odur ki, dividendin verilməsi Vergi Məcəlləsi ilə tənzimlənmir. Vergi Məcəlləsi yalnız və yalnız ödəmə mənbəyindən 10% gəlir vergisi tutulması və bu verginin dövlət büdcəsində ödənilməsi mexanizmini təmin edir.
Dividendlərin mütləq veriməsi vəzifəsi birbaşa qanunvericilikdə nəzərdə tutulmur. Dividendlərin verilməsi ilə bağlı kommersiya hüquqi şəxsin iştirakçılarının hüququ var ki, dividend tələb etsin. Əlbəttə ki, qanunvericiliyin yol verdiyi formada. Ümumiyyətlə, dividendlərin verilməsi haqda qərarın qəbul edilməsi kommersiya təşkilatının vəzifəsi yox, hüququdur.
Mülki Məcəllənin 90-1.2ci maddəsində göstərilir ki, məhdud məsuliyyətli cəmiyyətin hər bir iştirakçısının nizamnamə kapitalındakı mayalarına uyğun olaraq mənfəət almaq hüququ var. Cəmiyyətin nizamnaməsində ayrı qayda nəzərdə tutulmamışdırsa, xalis mənfəət ümumi yığıncağın qərarı qəbul edildikdən sonra bir ay müddətində ödənilməlidir. Yəni MMC-nin mənfəətini bölüşdürmək ümumi yığıncağın (və ya tək təsisçi olduqda, təsisçinin) müstəsna səlahiyyətidir, yığıncaq (və ya tək təsisçi) hansı qərarı versə, o da olacaq. Əgər yığıncaq qərar versə ki, bölüşdürülməmiş mənfəət (əvvəlki və hazırki hesabat dövrləri üzrə yığılmış xalis mənfəət) dividendlərin verilməsinə deyil, başqa istiqamətlərə, məsələn, uzunmüddətli aktivlərin alınmasına, digər investisiya qoyuluşlarına, müxtəlif kapital ehtiyatlarının yaradılmasına yönəldilsin, bu, qanunla yol veriləndir. Aydındır ki, ağıllı sahibkar heç vaxt pul qalığının saxlanılmasına maraqlı deyil və məntiq odur ki, xalis mənfəətin istifadə istiqamətlərinin tez bir zamanda müəyyənləşdirilməsi marağı xalis mənfəətin yaranması nəticəsində əldə edilən pul vəsaitlərinin də intensiv olaraq köçürülməsinə səbəb olacaq. Yığıncaq xalis mənfəətin bölüşdürülməmiş mənfəət şəklində saxlanılması qərarı da verə bilər və bu halda əldə edilən və sərbəst qalan pul vəsaitləri bank və digər pul hesablarında saxlanıla bilər. Bu, qanunvericiliklə qadağan olunmur.
Səhmdar cəmiyyətlərdə də proses demək olar ki, eynilədir. SC-in dividend siyasətinin (dividendlərin ödənilmə şərtləri və minimal həcmi, ödənmə ardıcıllığı, dividendlərin ödənilməsinə yönəldiləcək mənfəətin hissəsinin müəyyənləşdirmə mexanizmi və sair) olması daha məqsədəmüvafiqdir və bu siyasət səhmdarların ümumi yığınçağın qərarı ilə təsdiqlənməlidir.
Mülki Məcəllənin 106-1.3.7-ci maddəsində göstərilir ki, səhmdar cəmiyyətinin adi səhminin sahibi olan səhmdarının qanunvericiliklə müəyyən edilmiş qaydada cəmiyyətin xalis mənfəətindən dividend almaq hüququ var. 106-3.2-ci maddəyə əsasən səhmdar cəmiyyəti nizamnamədə müəyyən edilməsindən asılı olaraq dövriyyədə olan səhmlər üzrə aralıq (rüblük, yarımillik) və illik dividendlər ödəyə bilər. Səhmdar cəmiyyətinin dividendlərin ödənilməsi barədə öhdəlikləri onların ödənilməsi haqqında qərarın qəbul edildiyi gündən etibarən yaranır və 30 gün müddətində icra edilir. Səhmdarların tərkibinin dəyişməsi dividendlərin ödənilməsi barədə qərarın Mülki Məcəllə ilə müəyyən edilmiş müddətdə və qaydada icra olunmasına təsir etmir. Qeyd edək ki, aralıq (rüblük, yarımillik) dividendlərin verilməsi ümumi yığıncağın qərarı ilə təsdiqlənmiş bölüşdürülməmiş mənfəətin məbləği mövcud olduğu halda verilə bilər. Kortəbii surətdə, hər hansı əsaslanma omadan aralıq dividendlərin verilməsi qanunun tələblərinə ziddir.

 “Belə xərclərə vergi orqanının elektron qaydada anında nəzarət etməsi mümkün deyil”

 -           Bəzi həmkarlarımız hesab edirlər ki, vergi orqanlarının dividend ödənilməsi tələbini elektron vergi-hesab fakturanın tətbiqi ilə əlaqələndirirlər. Yəni, xərclərə vergi orqanları nəzarət edə bilər. Elektron qaimə-faktura təqdim edilməyən vergi ödəyicisi olmayan şəxslər üzrə məlumatlar vergi orqanlarına təqdim edilməlidir. Vergi orqanı səyyar vergi yoxlaması aparmadan rahatliqla vergi ödəyicinin xərcləri haqqında tam məlumata malik olur və bu səbəbdən vergi orqanı gəlir və xərclərin fərqi nəticəsində yaranan mənfəətdən dividend ödəniməsini tələb edir. Bu yanaşmaya fikrinizi bilmək istərdik.

-           Elektron qaimə fakturaların tətbiqinin məcburiliyindən sonra təsərrüfat subyektlərinin gəlir və xərcləri barədə vergi orqanlarında kifayət qədər məlumat bazası formalaşır. Elektron xidmətlərdən istifadə edən vergi ödəyiciləri əmək haqqı və əmək haqqı ilə əlaqədar xərclər barədə, malların, işlərin və xidmətlərin təqdim edilməsi və alınması ilə bağlı xərclər barədə, eləcə də digər zəruri hesab edilən məlumatlar dolayısı ilə vergi orqanının nəzarətindən kənarda qala bilməz. Belə məlumatların vegi ödəyicisi tərəfindən təqdim olunan müvafiq bəyannamələrin 1 nömrəli Əlavələrində aktivlər, öhdəliklər və kapitalın hərəkətini barədə məlumatlarla, həmçinin vergi orqanına təqdim olunanan digər bütün bəyannamə məlumatları ilə uyğunluğunun yoxlanılması vergi orqanı tərəfindən istisna edilmir.
Bəzi gəlir və xərclər var ki, məsələn, pərakəndə satış nəticəsində əldə edilən gəlirlər, qeyri-rezidendlərə göstərilən xidmətlər və görülən işlər üzrə gəlirlər, ezamiyyyə xərcləri, “Nağdsız hesablaşmalar haqqında” qanununun tələblərinə riayət edilməklə əhalidən tədarük edilən mallar üzrə nağd xərcləmələr, vergi ödyicisi kimi uçotda olmayan fiziki şəxslərdən qəbul edilən xidmətlər, alış aktları ilə alınmış mallar, qeyri-rezidentlərdən qəbul edilən xidmətlər üzrə xərclərə vergi orqanı tərəfindən elektron qaydada birbaşa (anında, əməliyyat baş verdiyi vaxtda) nəzarət edilməsi mümkün deyil. Bu cür məlumatlardan vergi orqanının vergi ödəyicisi tərəfindən müəyyən dövr keçdikdən sonra müvafiq bəyannamələr təqdim edildikdə xəbəri olur. Belə xərclərin xüsusi çəkisi az olur və vergi orqanı tərəfindən də belə xərclərin düzgünlüyünü yoxlamaq üçün müəyyən metodlardan istifadə olunur.
Bir sözlə, bütün gəlir və xərclər, aktivlərin, kapitalın və öhdəliklərin hərəkəti barədə dövriyyə və qalıq məbləğlərinin əhəmiyyətli dərəcədə düzgünlüyü vergi orqanı tərəfindən diqqətlə yoxlanılır. Vergi orqanına təqdim olunan bəyannamə məlumatlarının, əlaqəli sahələrdən (bank, ədv depozit hesabı, gömrük orqanları və sair) əldə edilən məlumatların və ən əsası elektron qaydada informasiya sisteminə daxil edilən elektron qaimələrdəki məlumatların bir-birinə uyğun kombinasiya və emal edilməsi nəticəsində vergi ödəyicisinin bəyan etdiyi vergilərin düzgünlüyü qiymətələndirilir.
Əgər hər hansı uyğunsuzluq yaranarsa, müvafiq qaydada vergi ödəyicisinə uyğunsuzluq məktubu göndərilməklə əsaslandırma tələb oluna bilər. Vergi ödəyicisi düzgün sənədlər və izahlı məktubla uyğunsuzluğu aradan qaldıra bilər.

 “Hesab edirəm ki, bu aktual məsələyə vergi orqanları tərəfindən yenidən baxılmalıdır”

 -           Son zamanlar kameral yoxlama nəticəsində sadələşdirilmiş vergi ödəyicilərinə dividend ödənilməsi haqqında bildirişlər və ya vergi orqanına dəvət haqqında xəbərdarlıqlar göndərilir. Mühasib həmkarlarımıza bu məsələnin həlli ilə bağlı hansı tövsiyələr verərdiniz? Ümumiyytələ, uyğunsuzluq necə baş verir? Belə uyğunsuzluqları Siz necə qiymətləndirirsiniz? 

-           Dividendlərin veriməsinə dolayısı ilə aidiyyəti olan bəzi təsərrüfat əməliyyatları ilə bağlı məbləğ göstəriciləri təbii olaraq ortalığa uyğunsuzluq çıxarır və vergi orqanı bu məqamı aşkara çıxararaq vergi ödəyicisinə uyğunsuzluq məktubu göndərir.
Məsələn, 1 nömrəli Əlavənin vergi ödəyicisinin xalis mənfəətinin hərəkəti barədə məlumatları əks etdirən "hesabat dövrünün xalis mənfəəti" (sətir 2.1.2) sərtində dövr ərzində daxil olan xalis mənfəət, silinən xalis mənfəət və dövrün sonuna xalis mənfəət məbləğinin qalığı göstərilir. Bu sətirdə dividend ödənişləri barədə məlumatlar əks etdirilmir. Çünki, əvvəl dediyimiz kimi, əslində dividend bölüşdürülməmiş mənfəət olduqda verilir. Hər dəfə növbəti ildə bu sətir üzrə qalıq məbləğ "əvvəlki illər üzrə bölüşdürülməmiş mənfəət" (sətir 2.1.3) sətrində "dövr ərzində daxil olmuşdur" sütununa köçürülür.
Digər tərəfdən, vergi ödəyiciləri əksər hallarda "hesabat dövrünün xalis mənfəəti" sətri üzrə "dövr ərzində daxil olmuşdur" sütununda vergi mənfəəti ilə mənfəət vergisinin fərqindən yaranan "xalis mənfəət"i əks etdirirlər və bu tamamilə səhv yanaşmadır. Əslində, həmin sütunda mühasibat stadartları ilə nəzərdə tutulan mənfəət və zərərlər haqqında hesabatda əks etdirilən xalis mənfəət göstəricisi əks etdirilməlidir. Əgər həmin sütunda vergi məqsədli "xalis mənfəət" məbləği əks olunarsa, bu halda "silinmişdir" sütununda vergi mənfəətinin hesablanmasında nəzərə alınmayan bütün xərclər və silinmələr (məsələn, maliyyə sanksiyaları, cərimələr və vergi məqsədləri üzrə gəlirdən çıxılmasına yol verilməyən xərclər, qiymətləndirmələrdən təsirlər, keçmiş dövrlərin yığılmış ödənilməmiş zərərləri və sair) əks etdirilməlidir.
"Əvvəlki illər üzrə bölüşdürülməmiş mənfəət" sətri üzrə uzun müddət (əvvəlki dövrlərdən artan yekunla) və əhəmiyyətli dərəcədə böyük qalıq məbləği əks etdirildikdə, vergi orqanında belə bir şübhə yarana bilər ki, məqsədi mənfəət əldə etmək olan müəssisə öz iştirakçılarına xalis mənfəəti bölüşdürmür və bu da MMC-nin fəlsəfəsinə uyğun gəlmir. Əgər xalis mənfəət bölüşdürülmədən saxlanılmışdırsa, deməli iştirakçıların bu barədə qərarı var və ya qərarı olmalıdır. Bəzən elə zənn edilir ki, həmin sətirin "silinmişdir" sütununda hər hansı məbləğ göstərilmişdirsə, yəqin bu, dividenddir və birbaşa vergi ödəyicisinə uyğunsuzluq məktubu göndərilir ki, bu barədə açıqlama versin. Belə uyğunsuzluq məktubuna ən yaxşı cavab iştirakçıların mənfəətin bölüşdürülməsi (istifadə istiqamətləri) ilə bağlı qərarının və “Mənfəət və zərərlər haqqında” hesabatın təsdiqlənmiş surətini qoşma etməklə əsaslandırılmış məktub yazmaqdır.
Bir sözlə, mənfəət vergisi və sadələşdirilmiş vergi bəyannaməsinin 1 nömrəli Əlavəsinin "hesabat dövrünün xalis mənfəəti" və "əvvəlki illər üzrə bölüşdürülməmiş mənfəəti" sətirləri üzrə məlumatlar vergi və mühasibat uçotu arasındakı müvəqqəti və daimi fərqlər nəzərə alınmaqla yaranan xalis mənfəətin (bölüşdürülməmiş mənfəətin) hərəkətini əks etdirilməlidir. Əks halda dividendlə və xalis mənfəətlə bağlı kameral məsələlərdə həmişə vergi orqanı ilə vergi ödəyiciləri arasında mübahisələr olacaq. Hesab edirəm ki, bu aktual məsələyə vergi orqanları tərəfindən yenidən baxılmalıdır.
Fikrimcə, bunun üçün 3 məqam düzgün təhlil olunmalıdır.
Birincisi, xalis mənfəətin məbləğinin kameral qaydada hesablanması zamanı həm sadələşdirilmiş vergi ödəyicilərində, həm də mənfəət vergisi ödəyicilərində gəlirdən çıxılmayan və ya gəlirdən məhdudlaşdırılmaqla çıxılan xərc məsələsi, həmçinin iki uçot arasındakı fərqlərin təsiri nəzərə alınmalıdır. Xalis mənfəətin məbləği bir az əvvəl dediyim kimi mühasibat uçotu məqsədli xalis mənfəətə əsaslanmalıdır, hərçənd, bunu bəyannamələrdən təyin etmək çox çətindir.
İkincisi, Mənfəət vergisi bəyannaməsinin və ya Sadələşdirilmiş vergi bəyannaməsinin 1 nömrəli Əlavəsində hesabat dövrünün xalis mənfəəti və əvvəlki illər üzrə bölüşdürülməmiş mənfəəti sətirinin "silinmişdir" sütununda əks olunan göstəricilər bütövlükdə dividend hesablamaları ilə əlaqələndirilməməlidir.
Nəhayət, üçüncüsü dividenddən tutulan 10% verginin müvafiq bəyannamədə əks etdirilməsini dividendi faktiki ödədiyi günün aid edildiyi rüb üzrə bəyannaməsində həyata keçirmək lazımdır. Yəni, dividendin verilməsi barədə qərarın verildiyi tarixin aid edildiyi rübdə dividend faktiki olaraq verilməmişdirsə, 10% vergi həmin rübdə deyil, dividendin ələ çatacaq hissəsinin faktiki verildiyi rüb üzrə bəyannamədə əks etdirilməlidir.
Əgər indi səsləndirdiyim 3 əsas məqam vergi orqanı tərəfindən tam qiymətləndirilərsə, vergi ödəyicisinin dividenddən vergi ödəmə öhdəliyi ilə bağlı uyğunsuzluq dərəcəsinə daha ədalətli yanaşılar.

 “Bu halda səhmdar cəmiyyəti dividendləri elan edə və ödəyə bilməz”

 - Mehdi müəllim, bəs, dividendin rəsmiləşdirilməsi necə aparılmalıdır?

- Gəlin, dividendin rəsmiləşdirilməsini MMC-nin timsalında nəzərdən keçirək. Bu zaman MMC-nin mühasibi aşağıdakı məqamlara diqqət yetirməlidir:
- MMC-nin ümumi yığıncağı tərəfindən qəbul edilən qərar olmalıdır və həmin qərarda bölüşdürülməmiş mənfəətin tamamilə və ya qismən bölüşdürülməsini müəyyən edən məzmunlar olmalıdır. Əgər qərarda dividendlərin verilməsi nəzərdə tutularsa, dividend ödənişləri, həmçinin dividendlərin məbləği və ödəniş metodu (forması) və müddətləri haqda məlumatlar əks etdirilməlidir.
- Dividend MMC-nin hər bir təsisçisinin nizamnamə kapitalındakı mayalarına uyğun olaraq hesablanmalıdır.
- MMC-nin nizamnaməsində ayrı qayda nəzərdə tutulmamışdırsa, dividend ümumi yığıncağın qərarı qəbul edildikdən sonra bir ay müddətində ödənilməlidir.
- Dividendlərin verilməsi ilə əlaqədar qərar qəbul edildiyi anda MMC qanunla müəyyən edilmiş müflisləşmə və ya iflas əlamətlərinə uyğun gəlirsə və ya həmin qərarın qəbul edilməsi nəticəsində belə əlamətlər əmələ gələcəksə, xalis aktivlərinin dəyəri onun nizamnamə kapitalından azdırsa və ya həmin qərarın qəbul edilməsi nəticəsində onun məbləğindən az olacaqsa, MMC mənfəətin bölüşdürülməsi (dividendlərin verilməsi) haqqında qərar qəbul etməməlidir. Səhmdar cəmiyyətlər üçün də oxşar müddəa nəzərdə tutulub. Belə ki, 106-3.9-cu maddəyə görə əgər səhmdar cəmiyyətinin xalis aktivlərinin dəyəri onun nizamnamə kapitalının miqdarından azdırsa və ya dividendlərin ödənilməsi nəticəsində az olacaqsa, səhmdar cəmiyyəti dividendləri elan edə və ödəyə bilməz.
- Dividendenddən 10% ödəmə mənbəyində vergi saxlanılmaqla qalan hissəni “Nağd hesablaşmalar haqqında” qanunun tələblərinə uyğun olaraq iştirakçıların (səhmdarların, payçıların, təsisçilərin, iştirakçıların) bank hesablarına köçürməklə və (və ya) kassa məxaric orderi tərtib edilməklə nağd qaydada ödənilməlidir. Yığıncağın qərarından və ya səhmdarlarla razılaşmadan asılı olaraq ödəmə mal şəklində və ya digər formada ödəniş həyata keçirilə bilər.
- Dividendlə bağlı bütün zəruri məlumatları rüblük ödəmə mənbəyində tutulan vergi bəyannaməsində əks etdirməklə vergi orqanına təqdim edilməlidir. Əgər dividendin əvəzi mal şəklində səhmdara, təsisçiyə ödənilərsə, təqdim edilən malın tam dəyəri dividendin hesablanan (elan edilən) məbləğindən 10% ödəmə mənbəyində vergi çıxıldıqdan sonra qalan məbləğ qədər olacaq. Malı təqdim edən müəssisə 10% ödəmə mənbəyində saxlanılan vergidən başqa təqdim edilmə ilə əlaqədar yaranan  müvafiq vergiləri də hesablamalı və dövlət büdcəsinə ödəməlidir.

ALTAY CƏFƏROVUN MÜƏLLİFİ OLDUĞU
MÜHASİBAT UÇOTU 2018 YENİDƏN İŞLƏNİLMİŞ IV NƏŞR SATIŞDA

Mühasiblərin stolüstü kitabı:  - Standartların sadə dildə izahı, 1000-dən çox müqayisəli müxabirləşmə

- Maliyyə hesabatlarının Dövriyyə cədvəli və hesabların təhlili əsasında nümunəvi doldurulması
- Mənfəət vergisi bəyannaməsinin tərtibi
- “Mühasibat uçotu haqqında” qanuna son dəyişikliklər layihəsinin şərhi

Siz sadəcə sifariş edin, biz ünvana çatdırarıq: 
012 564 86 85, 050 368 12 72, [email protected]

Vergi Qanunvericiliyi: Rəsmi Sənədlər və Şərhlər Toplusu SATIŞDA