Obyektin olmasınin riskli vergi ödəyicisi olmağa hansı təsiri var ? (3-cü yazı)

Xəbər verdiyimiz kimi, Azərbaycan Respublikasının Baş Naziri Əli Əsədovun 28 iyul 2020-ci il tarixli, 265 saylı qərarı ilə “Riskli vergi ödəyicisinin, o cümlədən riskli əməliyyatların Meyarları”ı təsdiq edilib.

Mks.az saytı olaraq həmin qərarla bağlı araşdırma yazıları təqdim edirik.

Üçüncü araşdırma yazımızın bu bölümündə qaydaların 2.1.3-cü maddəsində qeyd edilən meyarlar haqqında məlumat verəcəyik.

Qaydaların 2.1.3-ci maddəsində qeyd edilir ki,  idxalatçının, istehsalçının və ya idxalatçı olmayan ticarət fəaliyyəti həyata keçirən şəxsin vergi orqanında qeydiyyatda olan anbarı (o cümlədən icarəyə götürdüyü anbarı) və ya digər təsərrüfat subyekti (obyekti) olmadıqda və yaxud qeydiyyatda olan anbarın və ya digər təsərrüfat subyektinin (obyektinin) sahəsi ilə idxal və ya əldə edilən malların həcmi uyğunluq təşkil etmədikdə (digər şəxslər üçün sifariş əsasında gətirilən və bilavasitə sifarişçilərə təhvil verilən (sifarişçi vergi ödəyicisi olduqda VÖEN-i, fiziki şəxs olduqda adı, soyadı, atasının adı və FİN-i) mallar və hər bir sifarişçi üzrə sifarişin məbləği barədə məlumatların vergi orqanına təqdim edildiyi hallar istisna olmaqla) vergi ödəyicisi riskli vergi ödəyicisi hesab olunur.

Qaydaların 2.1.3-cü maddəsi sırf vergi ödəyicisinin obyekti ilə bağlı risk meyarlarını müəyyən edir.

Misal 1. Vergi ödəyicisi 300 000 manatlıq məbləğindaə mallar idxal etməsinə baxmayaraq, vergi orqanı müəyyən edir ki, vergi ödəyicisi hər hansı obyektə malik deyil. Bu zaman vergi ödəyicisinin obyektinin olmaması riskli vergi ödəyicisi meyarlarına aid edilməsinə əsas verir.

Misal 2. İstehsal fəaliyyəti ilə məşğul olan vergi ödəyicisinin 200 000 manat dəyərində, 1 litrlik meyvə şirələri təqdim etməsinə baxmayaraq,  vergi nəzarəti tədbirləri nəticəsində məlum olub ki, vergi ödəyicisinin anbar kimi təqdim etdiyi obyektinin sahəsi cəmi 50 kvadratmetrdir.  Bu zaman vergi ödəyicisinin riskli vergi ödəyicilərinə şamil olunması ehtimalı var.

Misal 3. Vergi ödəyicisi 180 000 manatlıq malı idxal etməsinə baxmayaraq, sifarişçi olan vergi ödəyicisi ilə bağlanan müqaviləyə əsasən, həmin malları digər sahibkara təqdim edəcək. Vergi ödəyicisinin obyektinin olmaması və ya həcminin az olmasına baxmayaraq, malları idxal edən vergi ödəyicisi riskli vergi ödəyicisi hesab olunmayacaq. Çünki, qaydalarda şəxslər üçün sifariş əsasında gətirilən və bilavasitə sifarişçilərə təhvil verilən (sifarişçi vergi ödəyicisi olduqda VÖEN-i, fiziki şəxs olduqda adı, soyadı, atasının adı və FİN-i) mallar və hər bir sifarişçi üzrə sifarişin məbləği barədə məlumatların vergi orqanına təqdim edildiyi hallar istisna edilir.

Vergi Məcəlləsində və “Sosial sığorta haqqında” qanunda 02 iyun 2020-ci il tarixinə nəzərdə tutulan bütün dəyişikliklərin şərh edildiyi, Anar Bayramovun müəllifi olduğu “Vergi uçotu: A-dan Z-yə” kitabı satışda