Parisdə keçirilən məhkəmə zamanı göstərilən müdafiə xərclərinə ƏDV və (və ya) ÖMV hesablanmalıdır?

Dövlət Vergi Xidməti suala aydınlıq gətirir

Sual:  Azərbaycan Respublikası rezidenti olan hüquqi şəxsin xaricdə hər hansısa bir məhkəmədə (məsələn Parisdə) maraqlarını müdafiə etmək üçün hansısa bir qeyri-rezident hüquq firması ilə müqavilə bağlayıb xidmətlər aldığı halda bu cür xidmətlərə görə ödəniş zamanı 125-ci, 169-cu və 13.2.16-cı maddələrə istinadən ödəmə mənbəyində vergi (ÖMV) və ƏDV hesablanmalıdırmı? Mən belə düşünürəm ki, hesablanmamalıdır. Belə ki, xidmətlər Azərbaycan Respublikası hüdudlarında göstərilmir. Məhkəmədə müdafiə də xaricdə təşkil edilir, müdafiəyə hazırlıq işləri də xaricdə görülür. Sizin mövqeyinizi bilmək maraqlıdır. Təşəkkürlər, öncədən!

Cavab: Bildiririk ki, Vergi Məcəlləsinin 168.1.5-ci maddəsinə əsasən məsləhət, hüquq, mühasibat, mühəndis və ya reklam xidmətlərinin, həmçinin məlumatların işlənilməsi üzrə xidmətlərin və digər analoji xidmətlərin göstərilməsi bilavasitə həmin xidmətlərin alıcısının yerləşdiyi və ya qeydiyyatda olduğu yerdə ƏDV-yə cəlb edilir. Buna əsasən qeyri-rezident şəxsin göstərdiyi hüquq xidmətlərinə görə ödənilən məbləğdən 18 faiz dərəcə ilə ƏDV hesablanıb dövlət büdcəsinə ödənilməlidir.

Eyni zamanda qeyri-rezidentin göstərdiyi hüquq xidmətlərinin tam dəyərindən ödəmə mənbəyində 10 faiz dərəcə ilə vergi tutulub dövlət büdcəsinə ödənilməlidir.

Əsas: Vergi Məcəlləsinin 125-ci və 168-ci maddələri.